Anita Geugien oet Drouwen: 'Ik bin nog altied een nuchtere Drèentse' | hier kom ik weg

Anita Geugien (58) woont naor eigen zeggen in het mooiste stukkie Drenthe in Friesland. Op de zieddeur van de veurmaolige schoel, waor zij zölf woont, waor gasten logeren kunt en waorin heur bedrief vestigd is, zit een sticker met Hier kuj Drèents praoten derop. ,,Met Berend praot ik altied nog Drèents. En as wij gasten hebt oet aandere dielen van het Nedersaksisch taolgebied, gef zu’n sticker wal herkenning. Met Twenten praot wij zo in de streektaol. Veul mèensen vindt dat mooi en wij ok.”

Taol hef Geugien altied al fascinerend funden, ok de streektaol. ,,Het is hielemaol niet da’k het Drèents vereer ofzo, maor het is wal mien eerste taol.” Yogalessen volgen in de streektaol? Geugien dreit heur haand der niet veur um.

Naost yogales geven, wat ze al dartig jaor döt, gef ze bijveurbeeld chakramassages, workshops over spirituele thema’s, aurareadings en -healings en opleidingen op dat gebied in De Lichtfontein. Ze is under meer certificeerd as yoga- en meditatieleerkracht, energetisch en lichaamsgericht therapeut, aura-reader en -healer en masseur.

Op heur 40ste reisde de geboren boerendochter oet Drouwen allent hen de Verenigde Staten um daor opleidingen bij klinisch psycholoog en chakradeskundige Anodea Judith te volgen. ,,Zij hef de westerse psychologie en de oosterse wiesheden over energie bij mekaar bracht. Heur lessen hebt mij hiel arg hölpen”, zeg ze.

Veur Geugien was het al vrog dudelijk dat der meer is tussen hemel en eerde, maor veul was lange tied vaag. ,,Op mien 13de he’k een mystieke ervaring had toen ik op berre lag. Ik wus da’k niet sleup, maor ik was argens in het universum en ik wus opiens precies hoe of het leven in mekaar zat. Ik vuulde ok hoe ik later terug in berre kwam. Wat ik de volgende dag nog wus, was under andere daw oes allemaol altied ontzettend drok maakt en dat het hier allemaol niks veurstelt.”

Geugiens mam starft as ze 15 jaor is. Daornao wordt ze opvangen in een gezin waor spiritualiteit hiel gewoon is. ,,Die mèensen brachten mij in contact met dingen waor ik al een natuurlijke interesse in had. Was veur mij niks vaags”, zeg ze beslist. Ze blek aura’s, oftewal energievelden, te kunnen zien en leert tiedens heur yogadocentenopleiding over chakra’s, de energieknooppunten in een lichaam.

Dat ze herinneringen hef an veurige levens, is veur Geugien ok hiel normaol. Ze prat der net zo over as over elk aander underwarp. Humor heurt daorbij. ,,Ik nuum mijzölf spiritueel undernimster, maor ik bin undertussen nog altied een nuchtere Drèentse, heur. Het grootste compliment da’k kriegen kan is as iene tegen mij zeg: ‘Goh je bent zó aards!’ en de grootste klacht die’k tegeliek ok wal ies van aandern krieg is: ‘Jíj bent zo áards!’ Haha. Aards vergeliek ik met nuchter. Maar as mèensen over iets wa’k doe zegt: ‘Daor bin ik veul te nuchter veur’, dan denk ik: ja, óf je bint bang. Maar ik huuf gieniene te bekeren. Een aander huuf het niet te geleuven.”