Ronald Lubbers oet Hesseln: 'Een dubbele agenda is in mien beleving not done' | hier kom ik weg

‘De Berlusconi van Drenthe’ nuumde een sportjournalist Ronald Lubbers veurig jaor in een column. Zoas old-premier van Italië Silvio Berlusconi veul geld stak in AC Milan, döt Lubbers dat bij Emmen. Ronald Lubbers (55) wil der niks van weten. ,,Dat döt mij niks, umdat het gewoon niet zo is.”

As zeun van een kleine transportundernimmer oet Schoonebeek hef e, sinds e Lubbers Transport begun jaoren ’90 overnam, alles behalve stil zeten. Aj met hum praot over zien vastgoed- en investeringsbedrief Orangerock en FC Emmen ontstiet al gauw het beeld van iene die altied an het wark is.

Dat is niet hielemaol waor, zeg e. ,,Op het bedrief he’k aandere mèensen zitten heur. Aans kun ik ok niet zoveul tied besteden an FC Emmen, want dat is in drokke tieden vanzölf ok gien 40-urige warkweek.”

In hoes, havezate De Klencke bij Hesseln, kan e soms even oet de drokte stappen. Wat ok helpt um zien drokke leven vol te holden, is mèensen gien mooie verhalen vertellen, wet e. ,,Aj altied zegt hoe het is, maak ie het jezölf een stuk makkelijker. Ie moet gien aandere bosschup ofgeven dan hoe het eigenlijk is. Een dubbele agenda is in mien beleving not done. En aj eerlijk bint, huuj ok niks te ontholden. Dat scheelt een hoop tied.”

In 2012 redt e FC Emmen veur de tweede keer van de financiële undergang. Het kost hum de neudige muite um het beeld van de ‘bodemloze put’ dat veul mèensen dan nog hebt weg te kriegen. En hoe aans is het nou. Nao de promotie hen de eredivisie is de club de trots van Drenthe en dat is nao de degradatie niet veul aans worden. ,,De gunfactor in Nederland is enorm en dat komp ok umdaw oetdraagt daw gewoon normaal doet en daw niet vergeet waor aw wegkomt.”

Het blef een mooi nummer, dat Hier kom ik weg van Daniël Lohues, vindt e. ,,Zien teksten bint prachtig. Wij hebt geregeld contact. Hij is met hiel aandere vraogen in het leven bezig as ik, maor dat vin ik juust mooi. Aansum is dat ok zo, umdat hij zöt dat ik niet het prototype undernimmer bin, maor hiel vrij van geest.”

Hebt zien veule successen hem veraanderd? ,,Neu, ik denk niet dat ik nou hiel aans bin as twintig jaor leden. Geld en macht doet vaak wat met mèensen. Aandern dicht je ok vaak allerlei dingen toe aj geld hebt, maor ik vin dat een totaal onbelangriek issue. Je goed vulen is het hoogst haalbare in het leven. Niks mooiers as dat. Dat hef niks te maken met auto’s, geld en macht.”

Met een pak an lopen, ‘u’ zeggen; hij hef der niks met. Lubbers prat as het kan gewoon Drèents. ,,Ik mark geregeld dat mèensen die mij niet kent een bepaald beeld van mij hebt. As ze me dan ontmoet, heur ik nao een poosie wel ies: ‘Goh, ie bint eigenlijk hiel gewoon, he’. Tja, denk ik dan, daj verbaosd bint, lig niet an mij, maor an het beeld dat aj zölf van mij creëerd hebt.”