Hilko Stoffers: ,,Ik stao altied veuran op het podium.” Foto: Geert Marissen
De rubriek Hier kom ik weg is een samenwarking met het Huus van de Taol en giet over Drenten en heur verhalen. Hilko Stoffers (39) oet Börk is bassist in de Drèentse band Aosem. Liedties schrieven en muziek produceren döt e ok.
Eerst een veuroordiel ontkrachten: de bassist is gien stil bandlid dat geern wat op de achtergrond blef. ,,Of ik bin de uutzundering op de regel”, lacht Hilko Stoffers. ,,Ik stao altied veuran op het podium.”
Hier kom ik weg
Samen met gitarist Erik Koerts en zanger/gitarist Harmen Boels hef Stoffers begun 2018 de band Aosem opricht. Zie maakt Drèentstaolige rootsmuziek. Ok zit Stoffers in de begeleidingsband van zangeres Jolien, met wel e dit jaor het Drèents Liedtiesfestival (DLF) wunnen hef.
Bartje
Muziek is van kinds ofan zien passie. ,,Ik struunde vrogger ok alle rommelmarkten of um cassetterecorders en mengpanelen te kopen. Mien hiele slaopkamer thuus stun vol met apparatuur. Geluudstechniek trök mij ok hiel arg.”
As kind hef e jaorenlang drumles en rond zien 18de begunt e met basspeulen. Ok giet e dan de opleiding geluudstechniek doen in Rotterdam. Hij lacht: ,,Bartje nuumden ze me daor vanwege mien ofkomst.”
Wark in de geluudstechniek vinden is niet lukt. De Börker warkt as monteur van under meer scan- en röntgenapparatuur in het UMCG, maor de muziek is altied bleven. Net as het Drèents. ,,Dat is mien eerste taol. Al praot ik het niet zo vaak meer, want mien vrouw sprek het niet. Maor met heur mam doe ik het wal. Zij kan het wal en dan vin ik het gewoon mooi um te doen.”
Börk
Stoffers hef in verscheidene bandjes speuld. Sinds zeuven jaor woont e met zien gezin in Börk. Daor leert e aandere muzikanten kennen die gangs bint met een Engelstaolig bandje. As het plan ontstiet um metan te doen met het DLF besluut ze um in het Drèents te gaon schrieven. Zo ontstiet de formatie Börk.
,,Wat der gebeurde op het DLF was naor oes idee veural kleinkunst. Wij vunden het wat oubollig. Pop en rock misten. Daor zagen wij een kans. Ik bleek op muzikaal gebied ok een goeie match te wezen met Erik. Wij hebt dezölfde smaak. Deur hum har ik materiaal um an te warken.”
Ellende
As ze Harmen Boels kennen leert, ontstiet oeteindelijk de zeskoppige band Aosem. Zie brengt in 2019 een EP oet en in novemner 2020 volgt heur album . ,,Ja, in de coronatied. Maor hij lag veur oes gevuul op de plaank te braanden. Hij mus deruut.”
Waor e de inspiratie veur liedteksten vorthaalt? ,,Oh, ellende. Maar ik heb gien ellendig leven heur. Dat schrief ik juust van mij of, haha! Ik ben een melancholisch type. Het lukt mij gewoon niet um vrolijke liedties te schrieven. Dat past ok niet bij oeze muziekstijl.”
Drèentse teksten komt harder binnen as Engelse, is zien overtuging. ,,Het lig veul dichter bij oes gevuul. Engels bi’j niet op diezölfde manier machtig. Ik schrief nou ok veul meer vanuut mien gevuul.”
Optreden vindt Stoffers hiel gaaf, maor ok nog altied eng. ,,Van teveuren he’k der veul zin in, maor aw haost op moet, is het altied doodeng. Ik bin hiel trots op dizze band en ik wil dat het goed giet. Maar as het eerste nummer ienmaol löp, dan is het goed.”
