De rubriek Hier kom ik weg is een samenwarking met het Huus van de Taol en giet over Drenten en heur verhalen. Dat Roelof Keen oet Klazienaveen van schrieven holdt, was al bekend. Hie hef twie Drèentstaolige boeken op zien naam staon. Maor dat e ok gek is op koken, wet niet iederien. In zien neiste boek Koken met Keen komt beide hobby’s samen.
Van makreel met witlofsalade en Zuud-Afrikaanse bobotie tot pindasoep oet Gambia en steufperen volgens het recept van zien zus Mientje; Roelof Keen hef in zien leven al hiel wat recepten verzameld. ,,Toen ik inspiratie zöcht veur een nei boek, vreug een goeie vriendin waorum ik gien kookboek schrieven gung. Dat leek mij mooi. En dan gien gewoon kookboek, maor iene met verhaalties over waorum ik juust die gerechten derin zet heb.”
As rolstoelatleet har Keen (57) al hiel wat van de wereld zien en daornao hef e met zien partner Anja veul reisd. Mooie inspiratiebronnen veur veul recepten en verhalen. ,,Het boek is des Roelofs met geregeld een vleugie humor en soms een flinke scheut.”
Hier kom ik weg
,,Der stiet bijveurbeeld een recept in veur chili con carne. Bij ‘Wat bi’j neudig’ stiet under meer: broene bonen, chilipepers en een slof keukendoekie. Bij ‘Wat moej doen’ stiet dan: Snie de pepers, wrief met de sloffe keukendoek de traonen oet je ogen.”
Communistische siepels
Bar wies is Keen met de illustraties van zien vroggere collega-atleet Gerrit Pomp. ,,Ok daor zit veul humor in. Ik nuum rooie uien argens in het boek communistische siepels. Daor hef hij een siepel bij tiekend die ofbladdert in de vörm van een hamer en een sikkel.”
,,Bij mien recept veur een huzarensalade is de liest bij ‘Wat moej doen’ hiel lang. Snie, dit, snipper dat, bak dit…”, vertelt Keen wieder. ,,Toen Gerrit en ik het derover hadden, dachten wij allebei an het lied van Ramses Shaffy. Dus hie hef der een Shaffy bij tiekend die zingt: ‘Snie, snipper, bak…’enzovoort. Geweldig toch?!”
Hennie’s Fobie
Sommige gerechten hebt ludieke namen, zoas , een pudding die maakt is van under andere karnemelk en eerdbeien. ,,Hennie is een vriend van oes en toen e met zien vrouw eten kwam, har ik die pudding maakt. Toen wij preuten over dinger die aj absuluut niet lust, zee Hennie dat e kotsen mus van alles waor karnemelk in zat…”
Keen wag de gok en zet het hum toch veur. ,,En hij hef der in eten, niet normaal. Ik heb nooit verteld dat der karnemelk in zat. Daor giet e nou achter kommen.”
Bij zien recept veur makreel met witlofsalade serveert e een verhaal over een vekaansie in Normandië. De boer waor ze een appartement huurden har heur makreel beloofd. ,,Allent toen e der met kwam, waren ze nog maor zunig an dood. Ik har niet begrepen daw ze zölf nog slachten mussen.”
Gien bestsellerauteur
Dat een Drèents boek worden mus, stun vast. ,,Ik kan mij in dizze taol het beste uten. Sommige mèensen zegt da’k veul meer boeken verkopen kan a’k in het Nederlands schrieven zul, maor ik heb nooit de ambitie had um bestsellerauteur te worden. Het giet mij juust um de streektaol. Het boek wordt volgende week prissenteerd. A’k het in haanden heb en het zo worden is a’k het mij veurstel, dan bin ik zo trots as een haan met stront an de poten.”
