Bert Bouwmeester in een brandweerauto op weg naar het gemeentehuis. Foto: Jan Anninga
De rubriek Hier kom ik weg is een samenwarking met het Huus van de Taol en giet over Drenten en heur verhalen. Bert Bouwmeester oet Erm hef haost achttien jaor burgemister van Coevern west. As het kun, preut e Drèents tiedens de bezuken die e oflegde. ,,Ik heb al vrog markt dat dat geweldig huulp um de drempel te verlegen.”
Nee, hij komp hier niet weg. Maor het lek haost wel zo, zeg Bert Bouwmeester (62) zölf ok. Hij is opgruid met het Drèents, al woond’e as kind in Zaandam, waor zien olders hen verhoesd waren veur het wark van zien pap. ,,Ik bin pas op mien 44e veur het eerst in Drenthe kommen wonen”, lacht e.
Maor de herinneringen an de vekaansies as kind bij zien grootolders en aandere familie in Aalden, Benneveld en Daolerveen bint nog hiel limtig. ,,Daor was ik in de vekaansies soms wal een paar week achter mekaar. As gezin stunden wij ok wel op de camping bij het zwembad in Zweel, mooi dicht bij de familie.”
Hier kom ik weg
Erpel krabben
Bouwmeester, die op 1 januari 2004 benuumd weur tot burgemister van Coevern, zöt zuchzölf nog as kind vanoet Zweel hen Benneveld lopen. ,,In mien vrogste herinneringen ben ik an het erpel krabben met mien opa.”
As a haost zeven jaor burgemister is van de Zuud-Hollandse gemiente Monster, wes zien pap – zien olders woont dan weer in Drenthe – Bouwmeester derop dat der een vacature is veur burgemister van Coevern. Daor zöt e wal een oetdaging in. Het hef een historische stad, waor de historie dan ver te zuken is en nog lang niet iederien is wend an de gevolgen van de gemientelijke herindieling.
,,En hoe vaak kriej die kans um an de slag te gaon in het gebied waor je veurolders wegkomt en waor aj zoveul gevuul bij hebt, dacht ik. Ik bin dan officieel geboren in de Zaanstreek, maor gevuulsmatig he’k meer met Drenthe.”
Vertrouwensperseun
Dat e Drèentstaolig opvoed is, is geregeld van pas kommen. ,,Altied a’k op bezuuk gung hen mèensen die 100 jaor worden waren of 60 jaor trouwd waren, begunde ik geliek Drèents te praoten as ze hier weg kwamen. Mèensen ziet der vaak wat tegenop as de burgemister komp en de streektaol warkte drempelverlegend, dat vuul mij geliek op.”
Hij hef veul verbaosde reacties had. ,,Een burgemister prat toch gien Drèents, dachten veul mèensen. Nou, dizze dus wal. As ze weet daj het kunt, wordt een bezukie der vaak mooier deur. Mèensen ziet je as een vertrouwensperseun en ik kreeg vaak hiel persoonlijke verhalen over heur leven te heuren.”
Drenten bint ok echt wel trots op heur provincie, hef Bouwmeester markt, maor oetspreken doet ze dat haost niet. ,,Het verschil met mèensen oet het westen is dat die veul directer bint. Hier moej vaak goed tussen de regels deur lustern um te weten wat ze bedoelt.”
Mörgen döt de neibakken Ridder in Orde van Oranje-Nassau en ereburger van Coevern de deur van het gemientehoes achter hum dicht. Argens aans burgemister worden, wil Bouwmeester niet. ,,Zo mooi as in Coevern wordt ’t nooit weer. Ik weet nog niet wat ik doen gao. Op het gebied van grensoverschreidend warken an de Duutse grens kan der nog veul verbeterd worden. Dat vind ik interessant. Maor de belangen van Drenthe behartigen, lek mij ok mooi.”
