De rubriek Hier kom ik weg is een samenwarking met het Huus van de Taol en giet over Drenten en heur verhalen. Jan Zwiers oet Aalden is zeuven jaor wetholder. Nao zes jaor in Coevern, met een kört oetstappie hen de directie van FC Emmen, mak e nou een jaor diel oet van het zakencollege in Hoogeveen.
Recht veur zien raap en allergisch veur ego’s; twie kenmarken van de in Hesseln opgruide Jan Zwiers (55). ,,As mèensen vreugen of ik al een beetie wend was as wetholder in Coevern, zee ik standaard: ‘Nee, maor dat möt ok niet’.” Vastberaoden: ,,A’k zul wennen an wat daor al gebeurde, dan wa’k niet kritisch genog meer.”
Hier kom ik weg
,,Of het wetholderschap schrikken was nao mien wark in het bedriefsleven?” Zwiers lacht. ,,Veur sommige ambtenaren wal, denk ik.” As e in 2014 wetholder wordt veur BBC2014, de grote neikommer in de Coeverder politiek, is e niet van plan um allent op het gemientehoes te zitten. ,,Aj verbinding met inwoners en undernimmers maken wilt, moej hen buten.”
,,As der wat is, kunt mèensen altied praoten kommen of ik gao daorhen. Op het gemientehuus vunden ze dat in het begun lastig, maor ik dee het toch. ‘Er moet wel een ambtenaar mee’, kreeg ik mangs te heuren. ‘Moej lustern’, zee ik dan, ’ik heb vieftien jaor as accountant warkt en met het tuchtrecht te maken had. Ik weet wat ik wal en niet zeggen kan’.”
,,Ik hol van een persoonlijke benaodering”, giet e wieder. ,,Zo steek ik as wetholder ok in mekaar. Ik doe mij ok niet aans veur as da’k bin.”
Gien huttie op de hei
Op de vraog waor e an dèenkt bij de titel van dizze rubriek, klinkt het beslist: ,,Dat ik een echte, autochtone Drent bin. En kom mij niet an Drenthe. Ik heb muite met mèensen die hierhen verhuust en oes de les lezen wilt.”
Zwiers nuumt as veurbeeld een vroggere buurtgenoot die kwam klagen toen hij en zien buurman met de bladblaozer an de gang waren. ,,Het was niet de bedoeling dat wij zoveul lawaai meuken. Mien buurman hef toen uutlegd daw hier niet in een huttie op de hei woont.”
,,Wij bint hier niet bang veur vrumden, maor ik vin het wal belangriek dat een stukkie Drenthe herkenbaar blef; de taol, de cultuur, hoe aw met mekaar umgaot… As mèensen hier wonen komt, moew rekenschup met ze holden, maor zij ok met oes.”
Deurdonderen
Het plat praoten, wat e van hoes metkregen hef, komp geregeld van pas in zien wark. Lest hef e bij warkveurzieningschap Stark west en metwarkt op een paar ofdielingen. ,,Die jongen vunden het hartstikke mooi. ‘En hij prat ok gewoon Drèents!’ reupen ze nao ofloop.”
Zwiers is opgruid met de streektaol en het plattelaand is hum heilig. ,,Ik bin ok altied Normaal-fan west. En waorum? Zij kwamen op veur de regio. Toen ik jong was, leup ik in zu’n jassie met ‘Deurdonderen’ derop.”
Aalden is al zu’n dartig jaor thuus veur hum en zien gezin. Van de natuur genieten döt e geern op de mountainbike. Hoe het met zien wark wieder giet, hangt of van wat de neie gemienteraod van Hoogeveen nao de verkiezingen in meert wil. ,,Ik hoop dat ze nog een paar jaor deur wilt met dit zakencollege. Ik vin mien wark as wetholder hiel mooi umdaj echt wat veur mèensen betieken kunt.”
