Tom Lubbinge prat plat tegen zien kinder. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Drèents as het kan, Nederlands as het möt. Dat is de overtuging van Tom Lubbinge (35) oet Rune. Hij prat geern en vaak plat, ok tegen zien beide kinder. Hij en zien vrouw Joanne voedt ze twietaolig op.
En as de liefde mar blef winnen, komp het allemaol wel goed. Een diel van een liedtekst van Daniël Lohues siert het geboortekaortie van zeun Hinke (nou 1 jaor). ,,Op die van oeze dochter Liede stiet een aander deel”, zeg papa Tom Lubbinge met een glimlach. ,,As de liefde mar blef winnen was ok het thema op oeze bruloft en wij vunden het mooi um dat een beetie deur te trekken.”
De muziek van Lohues beheurt tot Lubbinges favorieten. ,,Ik hol slim veule van alle streektaalmuziek, maor hij stek der veur mij met kop en scholders bovenuut. Zien teksten vind ik geniaal en muzikaal is e ok vreselijk goed.”
Het Drèents hef de Runer van kleins of an metkregen, het Achterhoekse dialect ok trouwens, want dat sprek zien mam. ,,Maor ze döt het allent met mien pap en heur familie. Tegen mij en mien zussies preut ze Nederlands. Mien pap tegen oes vrogger ok, maor nou niet meer. En verder preut haost iederiene in oeze umgeving Drèents.”
Hier kom ik weg
‘Normaal praten’
Op de middelbare schoel in Möppelt komp e, as e zitten blef in vwo 5, in een klas met meer jongen van het plattelaand as in die daorveur. ,,Ik vuulde mij daor meer bij thuus. Wij hebt ontzettend veul schik ehad.”
Maor Lubbinge herinnert zuch ok het commentaar van een leraar. ,,Hij heurde oes veur de les plat praoten en zee dat wij toch maor oes best mussen doen um ‘normaal te praten’. ‘Jullie zitten op de hoogste schoolopleiding van het land. Dan moet je daar wel naar streven’, vun e. Mien kameraod sprak toen de legendarische woorden; ‘Ie kunt mij van alles vertellen, beste kerel, maor van mien mooie Drenthelaand blief ie of’.”
Lubbinge lacht hard as e deran terug denkt. Dan serieus: ,,Later dacht ik: eigenlijk is het toch zörgelijk dat het beeld heerst dat plat praoten niet normaal zul wezen. Dat der op neerekeken wordt. Ik heb nou trouwens wel het gevuul dat daor wat een kentering in komp. Juust deur instanties as het Huus van de Taol, maor ok deurdat aal meer artiesten in de streektaal zingt.”
Buten of buiten
Zölf prat de Runer veur zien wark miesttieds wal Nederlands. Hij warkt deur het hiele laand veur een bedrief dat aandere bedrieven adviseert over energietoepassings, zoas bijveurbeeld hoe een bedriefshal zo goed meugelk koeld worden kan. ,,Ik zeg altied: Drèents as het kan, Nederlands as het mut. As klaanten niet plat praot, doe ik dat ok niet.”
Veur het opvoeden van de kinder hebt hij en zien vrouw ofspreuken dat zij zoveul meugelk Nederlands prat en hij zoveul meugelk plat. Hij wil de taol deurgeven. ,,Wij hebt heurd dat dit ok goed is veur de taalontwikkeling van kiender. Liede, die nou 3 jaor old is, is der al hiel bewust met bezig, mark ik. As ik zeg: ‘Kom, wij gaot hen buten’, dan zeg zij even later: ‘Papa, je kunt ook buiten zeggen, hè. Maar ook buten’. Kiender bint net een spons, ze leert alles zo makkelijk.”
