De rubriek Hier kom ik weg is een samenwarking met het Huus van de Taol en giet over Drenten en heur verhalen. Zo’n virtig jaor hef René Karst met zien mam Duo Karst west en in het Drèents zungen. Daornaost begund’e in 2007 een Nederlandstaolige solocarrière. Met succes. Toch verloochent e zien ofkomst niet.
Het begunde op een camping in Zuudwolde; een jaor of 11 was e. Bij het kampvuur zung e liedties met zien mam Jannie, die der gitaar bij speulde. Nao het winnen van een talentenjacht, begunde veur René Karst (54) het leven as artiest. ,,Ik heb nog nooit ewarkt”, zeg e met de neudige zölfspot.
,,As Duo Karst waren mien mam en ik wereldberoemd in Drenthe, Overiessel, Grunning en Friesland. Maor oeze cd’s met Nederlandstaolige schoelliedties hebt oes in de jaoren ’90 het hiele laand deur bracht”, blikt Karst terug in zien achtertuun in Hoogeveen.
Hier kom ik weg
Supergave tijd
In 2007 giet zien mam – dan 65 jaor – het wat kalmer an doen. ,,Ze har nog een tekst veur mij eschreven, zee ze toen. Dat was Supergave tijd, op de melodie van een Duuts carnavalsnummer.”
Zo begunt René Karst een solocarrière. ,,Mien vriend Tony Neef (musicalster oet Roon, red.) har al ies zegd: ‘Aj ooit solo gaot, dan moej Nederlandstaolig gaon en liedties gaon maken met een knipoog’. Dat wol ik ok. Mien moe har het mit dat nummer goed eziene.”
,,Kiek, ik moet het niet het hebben van het zingen. Mien zus Erikah is een veul betere zangeres as dat ik zanger bin. Ik bin meer een entertainer. Veur een zaal staon en een glimlach op het gezicht van meinsen kriegen, vien ik geweldig.”
Paplepel
Nao Supergave tijd volgt bekende liedties as Dat moet je niet doen, Liever te dik in de kist en Atje voor de sfeer. Karst wordt wereldberoemd in hiel Nederland. In de coronatied kreeg e – naodat e zölf veld west hef deur het virus – de kaans um een EP te maken met Nederlandstaolige country: Tevreden & Tequila.
,,Mien mam was ok gek op countrymuziek. Daor bin ik mit op-egruid en daor ligt mien hart.” Ok die EP is weer Nederlandstaolig. ,,Ik praot van huus uut gien Dreints. Mien olders deuden het wel, maor voedden oes in het Nederlands op met de gedachte: aj de streektaal mitkriegt, is het mooi mit-eneumen.”
Nao jaoren zingen en rondlopen in de streektaolwereld is het Drèents wal zien tweede taol worden. ,,Ik sluut niet uut dat ik nog weer gao zingen in de streektaal. Veurig jaor he’k mit Bökkers nog Bos holt veur de deur uut-ebracht, veur carnaval. En ik heb pas nog een Dreintstaolig nummer schreven veur de Dreintse band Oerend Hard.”
Opa worden
Schrieven döt e ok veur hiel veul Nederlandse artiesten. ,,Ik wor ’s mörgens wakker mit een melodie in mien heufd of een idee veur een nei liedtie en dan gao ik daormit an de slag. Ik heb hiel veul wark klaorliggen. Ik blief schrieven tot ik doodgao”
Het coronavirus en de twie autobraanden bij zien hoes veurig jaor bint hum niet in de kolde kleren gaon zitten, maor Karst blef positief. ,,Ik bin een optimistisch mens. Het hef een lastig jaor ewest, maor ik heb ok een golden plaat ekregen veur ‘Atje’ én mien vrouw en ik bint opa en oma eworden van een kleindochter. Wij hebt zo’n mooie tied had sindsdien. Prachtig.”
