Jacco Fluks presenteert ook het streektaalprogramma Dialect Direct op een aantal lokale radiostations. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Jacco Fluks oet Raol is opgruid met het Drèents en prissenteert in zien vrije tied het radioprogramma Dialect Direct dat under meer te heuren is op Radio Aa en Hunze.
,,De leste jaoren bin ik actiever bezig met de streektaol. Dat komp ok umdat ik het jammer vind as het Drèents straks hielemaol wel is”, zeg Jacco Fluks. ,,Alles wat der nou opschreven en maokt wordt, is belangriek.”
Van hoes oet hef a altied Drèents praot. Ok in zien vriendengroep van eerder was Drèents de voertaol. Het was gewoon. Pas de leste jaoren – nou e streektaolvrijwilligers is bij het Huus van de Taol - is e zuch der meer van bewust.
,,A’k nou kiek naor de jongen die bij het transport- en loonbedrief in Zuudlaorderveen komt, waor ik as administrateur wark, mark ik dat ze vaak commercieel plat praot. Ze sloekt veural de ‘en’ in en meer niet”, lacht e. ,,Aw dan bij mekaor zit, gebruuk ik mangs bewust wat oldere Drèentse woorden, zoas ‘zul’ veur drempel. Dan hebt ze gien benul waor ik het over heb.”
Hier kom ik weg
Dialect Direct
De 41-jaorige Fluks is in zien vrije tied prissentator van Dialect Direct, dat te heuren is op Radio Aa en Hunze, Radio Tynaarlo Lokaal, RTV Borger-Odoorn en vanof volgende maond ok bij Omroep Assen.
Het plat praoten is e zo gewoon dat e met Nederlands mangs muite hef. Engels giet hum haost makkelijker of. Dat komp ok deur de veule reizen die e maakt hef. Naodat e op zien 19de veur zien wark in Vietnam komp, wordt Fluks neisgierig naor aandere laanden. ,,Ik heb jaorenlang in het butenlaand zwörven; in under meer Australië en Nei-Zeeland. Daor he’k bij grote boerenbedrieven warkt. Op een gegeven moment kwam ik Nederlanders tegen, maor toen ik een praotie maken wol, was ik allent maor an het hakkeln. A’k hen huus belde, preut ik Drèents en wieder allent Engels.” Hij vrag zien landgeneuten um Engels tegen hum te praoten, dat giet stukken beter.
‘Streektaol is fantastisch’
Oeteindelijk komp e weerum in zien geboortedarp. ,,Toen ik hier weer was, wus ik: Raol is thuus. Ik woon nou met mien vriendin middenin het dörp en wil niet meer vort.”
Radiomaken ontdekt Fluks zu’n twintig jaor leden. Naodat e een paor jaor bij de streektaolcabaretgroep Drenthe Plat zeten hef, giet e bij Omroep Assen een programma over cabaret maken. Sinds twie jaor mak a Dialect Direct. Hij dreeit muziek in alle streektaolen oet hiel Nederland, al leg het accent op het Nedersaksisch. ,,Ik heb geliek zegd dat ik het prissenteren ok in het Drèents doen wol. Ik vind de streektaol fantastisch. Ik heb niet de illusie daw het uuteindelijk in staand holden kunt, maor ik vind het mooi um der met gangs te wezen.”
,,Ik mark dat artiesten mij weet te vinden as ze neie muziek hebt. Ik heb ok geregeld muzikanten in de studio. Die interactie vind ik mooi. Het prissenteren doe’k vanuut de studio in Annen en veur Börger-Oring vanuut 2e Mond. Wij bint nou an’t verbouwen thuus en mien doel is daor een studiogie maken, zoda’k het programma vanuut huus maken kan.”
