Geertje Enting uit Anderen. Foto: Marcel Jurian de Jong
De rubriek Hier kom ik weg is een samenwarking met het Huus van de Taol en giet over Drenten en heur verhalen. Geertje Enting oet Aandern is boerin, ze hef een projectbureau op landbouwgebied en ze schref en dicht in het Drèents. ,,Wij moet de streektaol veul zichtbaorder maken.”
De Drèentse vlag hangt in top bij de boerderij van Geertje Enting (47), heur man en drei kinder in Aandern. Ze woont alweer 24 jaor in het darp. ,,Maor mien paplepel lag lettelijk in Eext”, lach ze.
,,As kinder preuten wij In hoes Drèents, op schoel Nederlands, met oeze buurvrouw oet het Westen ok Nederlands en met oeze buren oet Frieslaand juust weer Drèents. Zo waren mien breur en ik aal an het schakeln en ontwikkelden wij een geweldige vertaolmachine. Pas later besefte ik hoe riek aj daordeur bint.”
Hier kom ik weg
Tussen de schrievers
Heur pap Geert, die in 2006 oet de tied kwam, was een veurvechter van de streektaol en schreef Drèetse verhalen en gedichten. Dochter Geertje Enting zat daordeur as kind al geregeld tussen de aandere Drèentse schrievers.
Lachend: ,,As der een neijaorsvesite was van de schrievers dan zaten wij under taofel met een kleurboek. Vunden wij niks bezunders. Pas laoter besefte ik bij wie wij allemaol under taofel zeten hebt: van Roel Reijntjes en Gerard Nijenhuus tot Tjaart Imbos en Bart Veenstra; alle- maol grondleggers van de Drèentse literatuur.”
Op heur 15de schreef ze heur eerste gedicht en schrieven döt ze nog altied. Ze is groots op heur taol. ,,Allent hij möt nog veul meer zichtbaor worden in de openbaore ruumte. Aj in Frieslaand komt, koj het Fries overal tegen. Waorum kan dat hier niet?”
Drènts op gebouwen
,,Het zul prachtig wezen as der teksten in de streektaol op gebouwen, bruggen en tunnels zet wordt. Iene die de taol machtig is, hef een gevuul van herkenning en een aander puzzelt derop. Aw de taol in de bienen holden wilt, moew hum bruken.”
Kinderambassadeurs anstellen, naost de streektaolambassadeurs van het Huus van de Taol, lek heur ok een goed idee. ,,Zölf lees ik alle jaoren veur op de basisschoel in Anloo, maor wat zul het mooi wezen as ze ok mekaor veurleest?”
Veul zeggen met weinig woorden
,,Der bint zulke mooie oetdrukkingen in de streektaol. As iene zeg: ‘Wat bin ie ja an ’t maggel
n’, dan wet elke Drent dat e niet zo netties schref. Wij kunt veul zeggen met weinig woorden. Een veurbeeld is een zin oet een stukkie van Harm & Roelof over de muziekveriening: ‘Hij rèerde mit zien klarinet een scheur in de kom van ’t aol kamnet’. Nou leg dat maor ies oet in het Nederlands. Prachtig toch?”
Enting en heur man praot ok plat tegen heur kinder. ,,Dat begrep ok niet iederien. Een vriendin van mij hef een kinderopvang en as daor iene Drèents komp veurlezen holdt sommige olders heur kind in hoes. Plat praoten zul niet goed wezen veur heur ontwikkeling. Kom op, zeg. Ze leert ok Engels.”
In 2015 hef ze derveur zörgd dat het wark van heur pap postuum oetgeven is in de bundel Nachtwaark. ,,Dat kun hij niet meer doen, hij is onverwacht oet de tied kommen op zien 58ste. Ik denk da’k hum recht daon heb. Mien eigen boek? Dat komp der lichtkaans ok nog wel. Ik heb genog materiaol liggen.”
