De rubriek Hier kom ik weg is een samenwarking met het Huus van de Taol en giet over Drenten en heur verhalen. Mark Tuit vertrekt nao 12,5 jaor bij natuureducatie-organisatie IVN Noord, waor e de leste zes jaor directeur was. Hij giet bij Unigarant in Hoogeveen an de slag as manager duurzaamheid. ,,Mien hart lig bij het zörgen veur een betere wereld.”
De coronatied zöt e as een wake-upcall veur hoe aw met mekaar samenleeft en met de eerde umgaot, zeg Mark Tuit. ,,Het nadert zien holdbaarheidsdaotum. Zu’n virus springt over van dieren op meinsen, net as bijveurbeeld ebola. As wij zo deurgaot, komp ‘t straks vaker veur. Wij moet beter veur de eerde zörgen.”
,,Kiek ok naor de biodiversiteit, waormet het in Nederland hiel slecht giet. As het slecht giet met de insecten, is dat slecht veur de veugels en uuteindelijk ok veur oes”, legt de 38-jaorige Hollandschevelder uut.
Met veul plezier hef e bij IVN Noord warkt, waor e – as vroggere schoelmister – eerst coördinator underwies was en in 2016 directeur weur. De organisatie is de leste jaoren in hiel Nederland hard gruid en verzörgt bijveurbeeld het lesmateriaal veur natuurunderwies in alle Drèentse gemienten.
Hier kom ik weg
CO2-neutraal warken
In jannewari begunt e bij Unigarant. ,,Duurzaamheid hef daor topprioriteit. In 2030 wilt ze volledig CO2-neutraal warken. Dat is een forse uutdading”, vertelt e. ,,Maor ik hol van bouwen. Vrogger bouwde ik hutten, as mister bouwde ik met an de toekomst van kiender en de leste jaoren he’k bouwd an IVN Noord. Mien neie baan is een uutdaging um te kieken of ik het daor ok kan.”
Hoe Unigarant de umslag maken giet is an hum um oet te warken. Samen met zien toekomstige collega’s, benaodrukt e. Aj dingen veraandern wilt, moej der samen veur gaon, is zien ervaring. En Tuit kan het weten, want hij giet ok nog trainingen leiderschap/verandermanagement geven bij opleidingsinstituut Yearth.
Hollandscheveld
Daornaost holdt e nog tied over veur zien gezin met drei dochters en veur zien ‘cluppie’ SV HODO, waor e veurzitter van is. ,,Ik bin een trotse Hollandschevelder. Ik heb der altied woond en ik blief der ok. Daor kome ik thuus. Bij de club praote wij ok altied plat. Dat vuult hiel eigen.”
De streektaol, die moew koestern, vindt e. ,,Ik hol ok van de Drentse mentaliteit: niet zeuren, mar doen. In mien wark zie ik geregeld dat in andere delen van Nederland veural veul epraot wordt. Dan binne wij al gangs. Hoe pakke wij dit an en hoe losse wij dat op? Wij doet het in Drenthe echt samen en daor mugge wij ok trots op wezen.”
‘Niet meer as een aander’
Het beter zörgen veur de eerde moew ok samen doen, vindt Tuit. ,,Moew bijveurbeeld fruit uut aandere landen in de winkel halen of gaow weer kopen van de boer en derveur zörgen dat die een eerlijke pries kreg? Ik heb der een hekel an dat boeren wegzet wordt as natuurhaters. Dat klopt niet. Ik ken veul boeren en de miesten wilt ok wel veraandern.”
Hij is niet ‘donkergruun’, zoas e sommige natuurliefhebbers nuumt. ,,Ik bin wel een linkse rakker, haha, Dat maj wel opschrieven.” Acht jaor zat e veur de PvdA in de gemienteraod van Hoogeveen. ,,Die partij stiet ok veur samen verantwoordelijkheid nemen. Ie moet oe nooit meer vulen as een aander. Ik kan dan wel directeur wezen, ik blief gewoon Mark uut Hollandscheveld.”
