Roelof Koops uut Elim is een groot liefhebber van de Drèentse natuur en van de streektaol.
De rubriek Hier kom ik weg is een samenwarking met het Huus van de Taol en giet over Drenten en heur verhalen. Roelof Koops (60) uut Elim is een groot liefhebber van de Drèentse natuur en van de streektaol. Zien dörp Elim is zien trots.
,,Het eerste waor ik an deinke as ik de name van dizze rubriek heur?” Roelof Koops spreidt zien arms: ,,Mien dorp en mien plekkie hier op Elim!” Hie zit op de baank in de woonkamer van zien olderlijk huus, waor e nou mit zien vrouw Alie woont. ,,Vrogger woonden mien va en moe mit negen kiender hier achterin. Veurin woonden mien opa en oma en an de ziedkaant mien oom en tante. Haost onveurstelbaar.”
Hier kom ik weg
Stientie bijdragen
Koops hef nao de scheiding van zien eerste vrouw een tied op ‘t Hogeveine woond en nou woont e alweer jaoren in het verbouwde olderlijk huus. ,,Toen ik hier weer wonen gung, bin ik in het bestuur van Plaatselijk Belang Elim erold. Ik wol mien stientie bijdragen hier. Eigenlijk vin ik dat iederiene in een dorp dat doen möt.”
Zes jaor hef e veurzitter west van de belangenveriening. ,,Veur ik derin kwam, zaten der lu van een oldere generatie in. Die hadden het idee dat ze altied vechten mussen veur oes dorp. Op ‘t Hogeveine kun alles en hier niks, mienden ze. Dat is natuurlijk niet waor en dat is ook wel ebleken. Wij hebt hiel wat veur mekare kregen.”
Alle dagen Drèents
Tegenwoordig is e ‘gewoon’ bestuurslid, mar zien betrokkenheid is der niet minder um. ,,Elim hef niet zo’n geweldig positieve name, mar ik vinne dat wij veul meer weerd bint as dat. En ik doe der mien beste veur um het beeld te veraandern. Ik vule mij een echte Elimiet en daor bin’k trots op.”
Drèents praoten is zien twiede natuur. ,,A’k Nederlands praot, blef het altied verbasterd Dreints, haha.” Op het wark - Koops warkt al 35 jaor bij Kip Caravans op ‘t Hogeveine – lig het deran met wel e prat of het Drèents is of niet. ,,De neie eigenaren koomt uut het westen. Ik praot Nederlands met ze, mar ik slao ze ook alle dagen met wat Dreintse woorden um de oren. Dat vindt ze prachtig!”
,,Ik heb ook uutelegd waorum ik de streektaal zo mooi vinne. Alie en ik waren bijveurbeeld een keer op vekaansie in Duutslaand. Daor kwamen we bij een particulier DDR-museum. Hoe langer het gesprek mit de eigenaar duurde, hoe platter hij praoten gung. In het lest preut e platduuts en ik plat Elims en kunden wij mekaar gewoon verstaon. Dat is het Nedersaksisch. Mooi toch?”
Wieken beholden
De geschiedenis en het landschap van de Drèentse Veenkoloniën holdt hum al jaoren bezig. ,,Ik zit in een warkgroep en wij wilt geern dat der een visie komp veur het behold van dit gebied. De leste wieken uut de veenkolonietied ligt hier in de bossen. As wij nou niks doet, bint ze der over vief jaor niet meer.”
Der is underzuuk daon naor de historie van het gebied. ,,Machtig interessant. Het möt leiden tot een visie over hoe wij mit dizze streek moet ummegaon in de toekomst. Wij wilt ook dat der een wandelroute vanuut Elim en Hollandscheveld hen de bossen bij Schoonhoven komp mit een bijbeheurende app. ,,Wij bint trots op Drenthe. Daor moew zunig op wezen!”
