De rubriek Hier kom ik weg is een samenwarking met het Huus van de Taol en giet over Drenten en heur verhalen. William Bossong oet Emmer-Compas is 23 jaor bassist en zanger bij de boerenrockband Mooi Wark en daornaost warkt e in de gehandicaptenzörg. De leste twee jaor is der veul veraanderd.
Of e nog wal herkend wordt, vreug een collega-artiest hum lestdaags toen ze mekaar toevallig tröffen. Veul minder, reageerde William Bossong. ,,Hij vun het vervelend. Ik vin het heerlijk”, lacht e. ,,‘Hé William! Blote kont!!’ heurde ik a’k argens kwam. Het is een stuk rustiger.”
De coronatied hef veul veraanderd, vertelt Bossong (41) in hoes an de keukentaofel. ,,Ik was altied best een losbol, maor ik bin rustiger worden. Ik waardeer de simpele dingen meer. Even met mien vriendin Andrea op de elektrische fiets hen Emmen veur een cappuccino met een gebakkie en dan weer op huus an. Niet echt rock ’n roll, nee. Dat is der wel of.”
Hier kom ik weg
Aander wark
Trammelant met het boekingskantoor en de gezondheidsklachten waor zanger en gitarist Bert Koops last van kreeg, zetten Bossong al veur de pandemie an het denken. ,,Wat as Mooi Wark stopt? Dan he’k niks, dacht ik. Ik was niet iene die echt met zien toekomst en spaarpotjes bezig was. Ik heb lange tied veural geneuten van het leven.”
Van iene die goed Drèents prat en zingt in de streektaol is het best een verrassing dat e gien Drèense roots hef; Bossongs olders komt oet Friesland en Grunning. Hij gruit op in Skonnerd, waor e tot zien 23ste woont. Drèents leert e in het dörp, gitaarspeulen van zien pap. Plaotsgenoot Koops vrag hum in 1999 veur Mooi Wark. ,,Het is mien eerste band. Ok mien leste trouwens. As dit ooit stopt gao’k niet argens aans meer speulen.”
In de coronatied komp de band stil te liggen. Bossong hef naost Mooi Wark altied in de gehandicaptenzörg warkt en begunt op anraoden van een collega as zzp’er. Hij warkt nou veur verschillende organisaties, under meer as woonbegeleider bij meervoldig gehandicapte cliënten.
In hoes is ok veul veraanderd: in november bint Andrea en hij olders worden van een tweeling. Trots lat e filmpies van zien zeunties zien en een foto waor zien 12 jaor olde zeun op stiet met de kleinties. ,,De coronapandemie hef mij hiel veul rust bracht. Vrogger wa’k altied op pad. Zoepen, gek doen en feesten was het mooiste wat der was. Nou is thuus een stabiele basis worden.”
Met Mooi Wark hef e de leste 23 jaor hiel Nederland deur reisd. Nummers as Idioot en In de blote kont wordt in alle feesttenten metzungen. ,,Deur de jaoren hen hew van alles metmaakt, gekke dingen daon en verschikkelijk veul lol had”, lacht e. ,,Ik bin nou wel meer met mien toekomst bezig. Ok umda’k leerd heb dat succes zomaar oflopen kan wezen.”
De boerenrockband bestiet dartig jaor en de mannen warkt an een nei album. ,,Wij gaot nou um taofel um een goeie planning te maken, zodaw naor dingen kunt toewarken. Dat hew nooit daon. Ik kan het nou nog ien keer goed doen, veur mien gevuul.
Bossongs wark in de zörg komp op een leger pittie te staon nou Mooi Wark weer kan optreden. ,,Het wordt drok, der is veul in te halen. Maar ik heb Andrea beloofd daw in december hen Bonaire gaot.” Lachend: ,,Dat nuumt ze compensatiegedrag, hè!”
