De rubriek Hier kom ik weg is een samenwarking met het Huus van de Taol en giet over Drenten en heur verhalen. Luc Enting (64) komp oet Garming, maor woont al roem virtig jaor op de Veluwe. Hij is al jaoren een bekende natuurfilmer en mak tv-programma’s en films. Zien bekendste wark is de bioscoopfilm Wild oet 2018, over dieren op de Veluwe.
Het Drèents praoten is Luc Enting nog niet verleerd, blek tiedens het gesprek op zien kantoor in Ede. Al döt e het niet veul meer, allent met familie en vrienden van vrogger. ,,Mien vrouw komp hier weg, dus in hoes doe’k het niet. En het gekke is, a’k allent hen Drenthe gao, praot ik Drèents, as mien vrouw met giet niet”, gniest e.
As boerenzeun gruit Enting op met de natuur in Garming en later in Baoling. ,,Mien pap was een groot weidevogelliefhebber en ok mien oom en tantes waren echte natuurmèensen”, herinnert e zuch. Drèents was de voertaol. In hoes, op schoel, overal.
Zien eerste baan, as leerling stedenbouwkundig tiekenaor bij de gemiente Assen hef e lichkaans daoran te danken. ,,Op het stadhoes in Assen zat een groepie stedenbouwkundigen oet de Achterhoek. Daor har ik geliek een klik met. Wij hebt hiel gezellig praot en een paar dagen later was ik annummen.”
,,Ik was hiel verbaosd. Der waren ningtig sollicitanten en de aandern hadden allemaol mts of hts daon. Ik allent lts en ik kun nog iens niet tieken. ‘Ie past zo goed in het team dat wij dachten: dat tieken leer wij hum wel’, zee de man die mij annam.”
Hier kom ik weg
Een paar jaor later kreg e een baan bij de gemiente Ede en zo verkast e hen de Veluwe. ,,Ien grapjas oet Drenthe die hier warkte, begunde in vergaderingen mangs opiens plat te praoten toen a’k hier net was. Nou, dan kun ik der gien normaal Nederlands meer oet kriegen.”
Dat is wal aans worden deur de jaoren hen en ok zien wark is slim veraanderd: Enting ontdekt de natuurfotografie en het filmen in zien eigen ‘habitat’ de Veluwe en dat blek hum goed of te gaon. Zien eerste film in 1996 het Het edelhert. ,,Al gauw toen ik hier woonde, wa’k hielemaol bezeten van dat dier. De eerste keer da’k der iene integen kwam, was zó indrukwekkend!”
De film wordt oetzunden deur de TROS en is zu’n succes dat ze ok een serie met hum maken wilt. Dat wordt Puur Natuur. Aandere series en films volgt. Wild, met commentaor van André van Duin, waorin het wilde zwien, de vos en het edelhert centraal staot, dreit in 2018 in zestig bioscopen. Hij is later nog twee keer as serie op tv te zien en trekt meer as een miljoen kiekers per oflevering.
Nou is Enting drok met de veurbereidingen van een neie Veluwefilm. ,,Gien vervolg van Wild, heur. Het möt meer gaon over hoe belangriek de Veluwe is veur het stelsel van verbindingen in de natuur in Nederland, zoas met Drenthe, de Oostvaardersplassen en Duutsland. Tegeliek giet het ok hiel slecht met de natuur. De biodiversiteit is de leste jaoren gigantisch underoet gaon. Dat moet zu’n film ok een beetie vertellen.”
Al wil e die bosschup niet te negatief brengen. ,,Dat warkt niet. Het is nooit te laat um der wat an te doen. De natuur herstelt zuch hiel snel. Wij kunt der ok hiel veul van leren. Dat wil ik geern zien laoten.”
