Robbert Oosting, programmamaker uit Hooghalen.
Foto: RTV Drenthe
De rubriek Hier kom ik weg is een samenwarking met het Huus van de Taol en giet over Drenten en heur verhalen. Robbert Oosting (31) oet Hooghaolen is programmamaker bij RTV Drenthe en prissenteert deurgaons in het Drèents. Maor in zien neiste tv-programma, de serie Haandwark die dreit um ambachtslu, wordt juust níet spreuken.
As puber oet Hooghaolen op weg naor de middelbare schoel in Assen fietste Robbert Oosting alle dagen langs het gebouw van RTV Drenthe. ,,Ik har toen ok al een fascinatie veur filmen en dacht: a’k daor nou toch ies warken kun later…”
Hij begunde met filmen met de eerste videocamera van zien olders. ,,Met plastic speulgoedsoldaties nam ik oorlogsfilms op. Monteren kun ik nog niet iens”, gniest e. De filmacademie lek hum mooi, maor de strenge selectie mak het niet antrekkelijk. ,,En dan har ik in Amsterdam moeten wonen. Achterof denk ik da’k dat stiekem ok hielemaol niet wol.”
Hier kom ik weg
Boerderij van zien oom
Oosting is geboren en getogen in Hooghaolen. Op een paar jaor in Grunning nao hef e daor altied woond. Roem een jaor leden hef e een deel van de boerderij van zien oom kocht in zien geboortedörp. ,,Toen ik 18 jaor was ha’k wel het idee da’k de wiede wereld in mus. Ik gung geern op reis. Maor hoe older ik word, hoe minder aordigheid ik der an heb.”
Tiedens de opleiding journalistiek op Windesheim in Zwolle kreg e een stageplek bij RTV Drenthe. Nao een ofstudeerproject in 2015 blef e ‘plakken’. Hij warkt nou veur de varia-redactie, waor e achtergrond- en human-interest-programma’s maakt. ,,Ik bin gien neisjournalist, meer een verhalenverteller.”
In zien tv-programma komt allerlei regionale bands en singer-songwriters langs. Veurig jaor zummer hef e met collega Loes van der Laan de tv-serie maakt, over de verschillen tussen en veuroordielen over zaand- en veendrenten. ,,Zoas dat in het veen messentrekkers en roeg volk woont”, lacht de zaanddrent in hart en nieren. Hij hef zien mening intussen wat bijsteld.
‘Drèents vuult vertrouwder’
Drèents praoten is een pré in zien wark en dat döt Oosting nou meer as eerder. ,,Ik bin niet echt Drèentstaolig opvoed. Mien olders preuten Nederlands tegen oes, maor wel met Drèentse uutspraken dertussendeur. Ik heb twee jaor een vriendinnegie had in Rotterdam en der gung een wereld veur mij open. Ik vreug daor ies an iene waor ze weg kwam en dacht da’k Hollands preut. Ze begreep der niks van. Dan kriej rare gesprekken”
,,Het Drèents hef der bij mij altied wel inzeten. Het was een kleine muite um echt plat te gaon praoten. En a’k nou olde opnames terugluster en mijzölf Hollands praoten heur, schrik ik der haost van. Dat klinkt geforceerd, Drèents vuult vertrouwder.”
Behalve deur filmen is Oosting ok fascineerd deur geschiedenis. In zien neiste tv-serie staot olde ambachten die nog altied beoefend wordt centraal. Zo bint under andern een klompenmaker, eulieslager, smid en een rietdekker in beeld bracht. ,,In het programma wordt niet praot. Het giet um het beeld en de geluden van het wark. Zo heur ie bij de rietdekker het knispern van het riet.”
,,In elf minuten ziej hoe dat ambacht uutvoerd wordt. Het is . Dat he’k bewust daon, umreden da’k denk dat de tillevisieprogramma’s van tegenwoordig veul te rap bint en dat mèensen het neudig hebt um mangs even pas op de plaots te maken. Het verhaal vertelt zuchzölf.”
