Kees Hendriks oet Emmen schreef een Drèentstaolig nummer veur Oekraïne: 'Ik mus het van mij ofschrieven' | hier kom ik weg

,,Aj die ellende allemaol ziet, dat giet ja van kwaod tot arger? Die beelden van kleine kinderties die met heur moeders op de vlucht bint; dat dat nog möt in dizze tied.” Kees Hendriks zit achter zien keyboard in zien warkkamer, annex studio, in hoes in Emmen. De oorlog in Oekraine döt hum veul. ,,Dat ien gek dit allemaol veroorzaakt… Ik mus het van mij ofschrieven.”

Hij hef het nummer Samen in vrede schreven en der samen met het Huus van de Taol een Giro555-actie an koppeld. Het nummer is te downloaden op de site van de streektaolorganisaotie en daor kan elk-en-ien ok een bedrag overmaken naor het bekende gironummer.

Sandy Altman en Marco ter Beek van Roxette-tributeband ROX! en zangeres Martijje hebt het lied inzungen. De muziek komp oet het digitale instrumentarium van Hendriks. ,,Veurda’k de tekst op papier har, har ik de muziek al in de kop. Het mus een soort We are the world-gevuul kriegen. Waorum in het Drèents? Ik bin een Drent en het is mien eerste taol.”

Hendriks komp van Nei-Dordt en hef de streektaol met de paplepel ingeuten kregen. ,,Ik heb wel vaker in het Drèents schreven. Met muzikant Bert Kamping van streektaolstichting REUR he’k twee streektaolalbums maakt. Hij is echt een kartrekker op het gebied van de Drèentstaolige muziek met zien Drèents Liedties Festival.”

Hendriks giet dit jaor preberen um met an te doen met een eigen lied én hij hef, samen met een bevriende muzikant, een lied schreven veur zangeres Anna Westerling oet Coevern. Twee inzendingen dus.

Deur zien opa kwam Hendriks in anraking met muziek. ,,Hij har een accordeon en leut mij as klein jochie op de toetsen drukken. A’k een liedtie heurd had, zöcht ik uut hoe ik het speulen mus en hij beweug de balg hen en weer, haha.” Hendriks hef klassieke en lichte muziek an de conservatoria in Grunning en Enschede studeerd.

Zien carrière begund’e as muziekleraar an de mavo op Klazienaveen. Later warkt’e an de muziekschoel in Emmen. Ondertussen speuld’e in bands, waormet e optrad op feesten en partijen. Later hef e nummers schreven veur artiesten as André Hazes, Henk Wijngaard, Joke de Kruif en The Dutch Boys.

Tegenwoordig mak Kees Hendriks muziek veur de natuurfilms van Henk en Janetta Bos oet Assen. De muziek bij de films Wildernis in Drenthe en Habitat is van zien haand. ,,Hiel gaaf um te doen. Zij maakt zulke prachtige beelden. Hiele orkesten kan speulen laoten vanoet zien computer. Alles speult e zölf in, tot stemmen van zangeressen an toe.

Met het schrieven van muziek is e nog lang niet klaor. Optreden döt e niet meer. ,,Ik mis het ok niet. De aandacht die aj op het podium kriegt is leuk en aj optreedt moej der ok 110 procent veur gaon. Ie bint er um de mèensen te vermaken. Maor stap ie van het podium of, dan bi’j wat mij betreft gewoon weer iene van die mèensen. Dat vin ik hiel belangriek. Ik bin hiel nuchter. De populaire jong oethangen he’k nooit daon.”