Marco Boer oet Dwingel warkt op het Roelof van Echten College in Hoogeveen as leraar in het praktiekunderwies: Wilt u ons Drents leren meneer? | hier kom ik weg
De rubriek Hier kom ik weg is een samenwarking met het Huus van de Taol en giet over Drenten en heur verhalen. Ningtien jaor woonde Marco Boer (48) oet Dwingel in het westen, waor e begunde met lesgeven in het speciaal underwies. Nou warkt e op het Roelof van Echten College in Hoogeveen as leraar in het praktiekunderwies en wil e Drèentse les geven gaon.
De mooiste ideeën ontstaot lichtkaans bij toeval. As Marco Boer een keer de klas binnenkomp en oetleg geven wil over de keuze-uren, is de klas onrustig. ,,Ik zee spontaan in het Drèents: ‘Nou moej ies even donders goed luustern. Hier he’k gien zin an. Ik kom hier om wat uut te leggen en moej kieken hoe aj oe gedraegt!’”
Hij hef iniens de aandacht van de pubers. ,,‘Huh, hij kan Drents!’ reup der iene. En een ander: ‘Meneer wilt u ons dat leren. Onze ouders leren ons het niet, maar Drents is toch gewoon onze tweede taal?’ En weer aander zee: ‘Ik wil beter Drents leren praoten as mien va en moe’.”
Hier kom ik weg
‘Eerst Nederlands leren’
Deur het veule enthousiasme besleut Boer dat e Drèents as keuzevak giet anbieden. De geboren en getogen Dwingeler hef het zölf ok niet van hoes oet leerd. ,,Mien olders preuten het underling wal, maor vunden dat wij eerst goed Nederlands leren mussen. Drèents zulden wij butenshuus wel leren. Via vrienden he’k het later ok leerd.”
As e veur zien wark hen het westen verhoest, verwatert het wal. ,,A’k dan hier was kun ik het wal verstaon, maor spreken gung niet meer. Naodat ik in 2017 met mien vrouw en dochter weerum komen bin, har ik het nao een paar maond weer aordig under de knie.”
‘Meer as lesgeven’
Het warken in het speciaal en het praktiekunderwies veur middelbare scholieren hef Boer altied prachtig vunden. ,,Ik weet nog goed dat iene bij mien eerste les op een schoel in Utrecht al een boek naor mien heufd gooide. Hij was kwaod umdat e mien uutleg niet begreep. Toen wij dat uutpraot hadden, gung ik deur met mien uutleg. Niet veul later stun e op, rend’e naor mij toe en umhelsde mij: ‘Meester, ik snap het. Ik hou van u!’ Toen dacht ik: dit is toch machtig mooi?”
,,In het praktiekunderwies is het sociale aspect veul belangrieker as in het reguliere underwies. Het giet veul wieder as lesgeven allent. As leerkracht bi’j mangs haost een surrogaat-pap of -mam of een pedagogisch hulpverlener.”
‘Kop in de zunne’
Boer gef vakken as Nederlands, Engels, geschiedenis en rekenen. De Drèentse lessen, waormet e volgend jaor van start giet, komt der in samenwarking met het Huus van de Taol. ,,Ik gooi der nou tiedens mien lessen al geregeld wat Drèents tussendeur. Vraog ik an ien van de jongen of e nog hen vissen giet van ‘t weekend, is het antwoord: ’Ja, misschien wel. Maor as ’t te warm is, gao ik met de kop in de zunne, meneer’. En dan hef zo’n jong een lol!”
De streektaollessen kriegt vörm an de haand van een een lesmethode oet een aandere provincie, die wordt vertaald in het Drèents. ,,Het giet der um dat der lesmateriaal komp veur twee lessen in de week een hiel schoeljaor lang. Dan kunt de kinder an het eind van het jaor in huus zeggen: ‘Nou kan ik ok Drèents praoten’.”
