Maickel Harmers: 'Ik leef echt voor FC Emmen' | Hier kom ik weg

Dat iene vrijkaortie dat e kreeg in 1997 hef het leven van Maickel Harmers veurgoed veraanderd. Tien jaor was e toen e veur het eerst een wedstried van FC Emmen zag in stadion De Meerdijk. ,,Ik was geliek verkocht.”

,,Een paar jaor later gung ik met kameraoden allent op de fiets derhen. Ik wol zoveul meugelk wedstrieden in het stadion zien. Mien mam zee wal ies da’k niet wies was”, lacht e. Altied har e de stille hoop dat Emmen promoveren zul naor de eredivisie. ,,Maor ik heb nooit echt dacht dat ‘t gebeuren zul.”
Harmers was der drok met in zien tienerjaoren, maor destieds was het aans as nou, zeg e. ,,Ik was toen niet zoveul met FC Emmen bezig as nou. Ik leef der echt veur. De leste tien jaor bin ik haost hen alle wedstrieden west.”

FC Emmen is de trots van Drenthe, dat stiet veur Harmers wal vast. Hoe groots e zölf op Emmen is, blek wal as e zien shirt oetdöt. Het logo van de club siert zien linkerscholderblad. Op zien rechterkuut stiet een ofbeelding van de Brigata Fanatico. Ok de namen van zien veer kinder mugt niet ontbreken.

Dat shirt giet tiedens wedstrieden van FC Emmen boeten coronatied trouwens ok geregeld oet. Harmers is samen met en kameraod anjager in het Brigata Fanatico-vak: ze zet vaak liedern in um de sfeer derin te holden, maor ok doet de mannen geregeld heur shirt oet um de boel op te zwepen. Weer of gien weer.

Zeun Liam (8) komp ok even kieken tiedens het gesprek. ,,Ik ben ook fan, net als papa”, glundert e. ,,De jongste fan van de club? Nee, dat is mijn broertje Sepp van 2.” Lichtkaans bint de jongen nog niet zo nerveus veur de wedstrieden as heur pap. ,,Ik bin altied vrog wakker op een wedstrieddag en hiel gespannen. Veur de promotiewedstried van Emmen tegen Sparta in 2018 heb ik hielemaol niet slaopen.”

Het gemis van het bezuken van wedstrieden is groot, verzucht e. Ien coronajaor lang hef Harmers niet op de tribune zeten. As sfeeractie hef de Brigata Fanatico der nog wel lochies en zu’n dreihonderd poppen henzet um de speulers een hart under de riem te steken, maor zölf mugt de fans der niet zitten.

,,Vuurwarkacties hew ok wal daon. Stunden wij boeten het stadion vuurwark of te steken. Lest mus een wedstried even stillegd worden deur de rook. Daorum biw der nou veurzichtig met. Emmen möt daordeur gien boetes kriegen van de KNVB.”

Tot drei week leden was der lange tied weinig um vrolijk van te worden; FC Emmen har haost een hiel jaor gien wedstried wunnen. ,,Dat hef mien humeur wal lang bepaald ja. Ik heb ok wal even dacht: dit was het dan. Maor nou het beter giet, denk ik dat der zeker een kans is daw in de eredivisie blieft.”