Dineke Arends kwam der nao heur 20e achter dat ze autistisch is. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Dineke Arends (35) oet Assen wus as kind in Giesbrug al dat ze aans was as de mieste andere kinder in het darp. Pas nao heur 20e kreeg ze de diagnose autisme. Bij de provincie Drenthe, waor ze warkt, is ze autisme-ambassadeur.
,,Het is asoj leeft in een wereld waorin iederiene het script van het tenielstuk hef, allent ie niet. Iederene wet wat of e doen mut en hoe ze met mekaar moet ummegaon en ie denkt: hoe wet iederiene dat?”
Lange tied wus Dineke Arends niet wat heur mankeerde, allent dat ze aans was. Heur buurjongen vrogger in Giesbrug was ok zo en weur hiel slim pest. ,,Ik dacht: as ze derachter komt dat ik net zo bin as hij, dan bin ik an de beurte. Alles wat aans was weur niet accepteerd in het darp.”
Hier kom ik weg
Arends paste zuch altied an um niet op te vallen. ,,Mien breurtie en ik bint ik Nederlandstalig op-evoed. Tegen mekaar preuten mien olders wel Drèents. Maor op de basisschoele heurden ie der niet bij aj gien Drèents preuten, dus gung ik dat ok doen.”
Op de middelbare schoel in Hoogeveen woj juust as dom zien aj plat praot, ontdekt ze, dus past ze zuch weer an. Ze studeert Internationale Betrekkingen an de Rijksuniversiteit Groningen as ze onverwacht zwanger raakt en op heur 21e heur oldste zeun kreg. En paar jaor later, nao de geboorte van de tweide, löp ze vast.
Dat ze mangs zo overprikkeld is dat ze de simpelste dingen niet meer doen kan, maor wal een scriptie schrieven kan over een wetenschappelijk underwarp, was al wel ies lastig te begriepen veur heur man, maor dan raakt ze ok depressief.
,,Toen ik bij de GGZ de diagnose autisme kreeg, vulen de puzzelstukkies op heur plek. Wat mij enorm hölpen hef, is online contact met aandere autisten. Het mak zoveul verschil aj jezölf begriept! Dan kuj het ok beter uutleggen an een aander.”
,,Ik vergeliek autisme met een computerbesturingssysteem: die hiele wereld warkt op Windows en is daorop inericht, maor as autist hej een iMac. Ok een goed systeem, maor het warkt vaak lastig samen met Windows.”
Naost heur wark as under aandere subsidiemetwarker veur cultuursubsidies is Arends autisme-ambassadeur bij de provincie. ,,Het doel is de samenwarking tussen autistische en niet-autistische collega’s te verbetern. Feitelijk bin ik ervaringsdeskundige.”
,,Ik denk ok met over oons inclusie- en diversiteitsbeleid. Dat is derop ericht dat iederiene der mag wezen en ok kan mitdoen; van LHBTI-collega’s tot blinde collega’s en collega’s mit een chronische ziekte. Binnen de organisatie mut iederiene zuch prettig vulen. Dat doe wij ok deur met een warkgroep kritisch te kieken naor wat beter kan.”
Nao Wereld Autismedag op 2 april stiet autisme ok de rest van de maond wat meer in de schienwarpers. ,,Ik zie der aal meer over veurbijkommen en dat is mooi. Mien oldste zeun van 14 is ok autistisch. Wij begriept mekaar hiel goed. Hij kan ok hiel goed onder woorden brengen wat e hef. Deurdat hij veul eerder zien diagnose hef had as ik, huuft hij gelukkig niet die hiele deur te maken.”
