Broersma hef zuchzölf gitaar speulen en drummen leerd. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Skroetbalg is de neiste band van Sander Broersma (37) oet Klazienaveen en twee van zien maoten. Harde muziek hef e altied al mooi vunden. Hij hef in zu’n tien bandties zeten, maor mak nou veur het eerst punkrock in het Drèents.
,,Skroeten is opscheppen in het Zuudwest-Drèents. As daor iene uut het westen in een cabrio veurbij komp, zegge wij al gauw: ‘Wat een Skroetbalg’.” Hij lacht erbij as e het vertelt. Sander Broersma komp van Hollandscheveld, vandaor het Zuudwest-Drèents. Dat hef e ok altied spreuken. ,,Ik kan wel Nederlands, maor nao een kwartier glier ik toch of naor het Drèents. Of klim ik op, net hoe aj het zien wilt.”
As kind komp e met muziek in anraking deur de elpees van zien olders. ,,Zij hadden een hiel briede smaak, maor ik zöcht de wat hardere muziek deruut; ACDC, Normaal, Status Quo, het hardere wark van Kiss…”
Hier kom ik weg
Op de havo in Hoogeveen leert e de alternatieve muziek-scene daor kennen. ,,Der waren veul underground-, punk- en hardcore-bandties die optraden in bijveurbeeld Het Podium. Der gung een wereld veur mij open.”
Hij leert zuchzölf gitaar speulen en op zien 14e kocht e van zien spaargeld een drumstel en leert zuch dat ok an. ,,Ik zal niet zeggen da’k een virtuoos eworden bin, maor ik vien het machtig mooi en a’k iets kan, wil ik het ok zo goed meugelk doen.”
Broersma belandt in verschillende metalbands en met ien daorvan tredt e op in binnen- en boetenlaand. ,,Wij speulden in zaalties in bijveurbeeld Duutsland, Polen en Tsjechië… Kwamen wij in Tsjechië, leupen daor lui met oeze shirties an. Machtig mooi!”
Vanof zien 21e warkt e bij DOC Kaas in Hoogeveen, maor de muziek blef een grote rol speulen in zien leven. ,,Ik bin altied met muziek bezig en heb ok altied wel een liedtie in de kop.”
Ok is e gek op taol. ,,Het Drèents lig het dichtst bij mij en ik bin der ok verschrikkelijk trots op da’k uut Drenthe koom.” As Broersma een kameraod vrag of die der wat veur vuult um een punkbandtie te begunnen, komp die met het idee Drentstaolig te gaon zingen. Zo ontstiet Skroetbalg begun dit jaor.
Ze nimt een demo-tape op en kriegt een bult enthousiaste reacties. ,,SP-Kamerlid Peter Kwint vreug oes nummer zölfs an toen e in verkiezingstied te gast was bij 3FM. Hij bleek oeze demo te hebben. Toen de dj het nummer drèeide, wordden wij hielemaol gek.”
Skroetbalg hef intussen al meerdere optredens pland staon veur as het weer mag. De band mak harde muziek met een vette knipoog, wordt dudelk aj heur teksten heurt. Zoas in het nummer : .
Volgende maond doet ze met an het Drèents Liedties Festival. ,,Machtig mooi daw daor zien kunt laoten wat der nog meer is an muziek in Drenthe. Het is echt van hier en ik dèenk dat nog veul meer mèensen het zo maor ies hiel tof vienden kunt. Wat dervan komp, dat komp dervan. Wij doet het echt umdaw het mooi viendt.”
