De rubriek Hier kom ik weg is een samenwarking met het Huus van de Taol en giet over Drenten en heur verhalen. Amber Tieck (22) oet Emmen döt de masterstudie Meertaoligheid an de Rijksuniversiteit Groningen. Ze giet underzuuk doen naor olders die heur kinder in het Drèents opvoedt. ,,Ik har ok geern van kinds of an Drèents praoten wild.”
,,Drèents praoten is nog hiel nei veur mij. Het vuult nog een beetie as een vrumde taol a’k het spreek.” Amber Tieck glimlacht an de keukentaofel in Emmen. Ze hef in hoes en bij heur femilie wal altied Drèents heurd, maor tegen heur weur Nederlands praot. ,,Toen ik older weur, dacht ik: zunde eigenlijk da’k het nooit leerd heb.”
Hier kom ik weg
Tieck is gek op taol. Op het gymnasium in Emmen döt ze niet allent eindexamen in Nederlands, Engels en Duuts, maor ok in Spaans en Latijn. ,,Vrogger as we op vekaansie gungen, leerde mien mam mij altied tot tien tellen in de taol van het laand waor wij waren. Biezunder eigenlijk dat ze mij het Drèents niet leerd hebt.”
'Algemeen beschaafd Nederlands is een mythe'
Tiedens heur bachelorstudie Europese Talen en Culturen prat ze veur underzuken ok met familie over het opvoeden in het Drèents of Nederlands. ,,Vaak kreeg ik te heuren dat ze heur accent probeerden te verbargen en zo goed meugelk Nederlaands praoten wolden, zodat heur kinder niet ok met een accent praoten zulden.”
,,Nou denk ik: wat is der arg an dat aandern heuren kunt waor aj vort komt? Dat kuj an hiel veul mèensen, oet het hiele laand, wal heuren. Algemeen beschaafd Nederlands is een mythe, een schrieftaol. Dat is niet hoe de mieste mèensen in hoes met mekaor praot. Iederien gef der zien eigen kleur an.”
Tieck löp stage bij het Huus van de Taol in Beilen. Ze prat nou dus veul meer Drèents en les Drèentse boeken. ,,Tiedens mien bachelorstudie was ik al drok met de streektaol. Deur de jaoren hen he’k de reputatie opbouwd van de fanatieke Drent van de studie. Underzoek doen naor het Drèents vind ik het mooiste wat der is.”
Underzoek naor opvoeden in het Drèents
Heur bachelor-scriptie gung over de holding van jongern van 15 en 16 jaor ten opzichte van de streektaol en leverde heur hiel veul respons op. Ze begunt nou met heur underzoek naor opvoeden in het Drèents. Behalve over het waorum drèeit heur het der ok um waor olders die heur kinder in het Drèents opvoeden wilt behuufte an hebt. ,,En wat kan der daon worden um het gemakkelijker, beter en gewoner te maken”, vult Tieck an.
,,Ik zul het mooi vinden a’k in de toekomst ok an de slag kan met het verbetern van de positie van het Drèents; het nog zichtbaarder maken van de streektaol. Het mag wel wat gewoner worden daw Drèents praot. Daj niet allent ‘gewoon Nederlands’, maor ok ‘gewoon Drèents’ praot.”
,,Ok het veuroordiel daj dommer bint aj in de streektaol praot möt verdwienen. De taol die aj praot, zeg niks over hoe intelligent aj bint. Net as het veuroordiel dat het schadelijk veur de ontwikkeling van een kind wezen zul aj het Drèents opvoedt. Dat is achterhaalde info. Kinder die meertaolig opvoedt wordt, kunt juust beter schakeln tussen verschillende taken.”
