Geeke Snijders met hond Pleun die ok geern op de foto wol. Foto: DvhN
De rubriek Hier kom ik weg is een samenwarking met het Huus van de Taol en giet over Drenten en heur verhalen. Geeke Snijders-Hoiting (54) oet Daolen hef altied een passie veur Drenthe had. Samen met aandern hef ze Marketing Drenthe opzet en het leste jaor hef ze underzocht hoe het Nedersaksische taolgebied beter op de kaort zet worden kan.
,,O’k nou in de Achterhoek, in Overiessel of in Drenthe bin, het gevuul is geliek, heb ik ontdekt. In mien underzuuk kwam ik derachter dat dat niet allent komp deurdat in dat hiele gebied Nedersaksisch spreuken wordt, maor umdat der ok ien Nedersaksische cultuur is.”
Geeke Snijders, die tegenwoordig in Overiessel woont, hef as marketingstrateeg oetgebreid underzuuk daon naor het Nedersaksisch, dat erkend is as officiële taol. Centraal stund de vraog hoe de taol, waor onder meer het Drèents, het Stellingwarfs het Grunnigs en het Twents varianten van bint, beter op de kaort kommen kan.
De deur lös
Net as heur man Peter, die burgemister van Zwolle is, is Snijders wies met heur Drèentse wortels. ,,Ik heb een prachtige jeugd had. In hoes preuten we in de streektaol. Nederlands hew op schoel leerd.”
,,Ik vind het wal jammer dat de generatie die haost allent maor Drèents prat, zachiesan verdwient. Maor de gewoonten: de cultuur van naoberschap, altied welkom bij mekaar wezen en de deur die altied lös stiet. Dat vuul ik nog altied.”
Drèents accent
Nao heur studie commerciële economie, giet ze samen die kant met Peter hen Den Haag, waor hij wark kregen hef. Zölf giet ze op de marketingofdieling van een opleidingsinstituut an het wark. ,,Ik heb nooit muite daon um mien accent te verbargen. Ik slikte gewoon de -en in, weej wal? Waor ik ok kom, ik laot nog altied marken da’k trots bin op Drenthe.”
Nao een paar jaor gaot ze weerum. ,,Ik dacht: wil ik alle dagen tussen die flatgebouwen deur hen mien wark blieven fietsen, zunder da’k natuur zie? Wij kwamen der haost nooit oet de bebouwde umgeving.”
Snijders richt in 2005 samen met aandern Marketing Drenthe op. ,,Het doel was Drenthe op de kaort zetten as provinvie um in te wonen, te warken en te leven. Ik heb der zeuven jaor met hiel veul plezier warkt.
Taol as bindmiddel
Heur Drèentse wortels speult haost altied een rol in heur wark. Zo mak ze under meer een visie veur de gebiedsontwikkeling van de Maatschappij van Weldadigheid in Frederiksoord. In het underzoek naor het Nedersaksisch is het niet aans. Dat het Nedersaksisch veul meer as een taol is, is Snijders’ belangriekste conclusie.
,,Oeze gewoonten en hoe a’w mit mekaar umgaan bint van oldsher geliek, van Grunning tot de Achterhoek. Deur oes meer op oeze mandielige cultuur te richten, schep wij verbinding. Het zul mooi wezen aw vanoet oeze identiteit ien culturele regio wezen kunt, zoas Beieren dat in Duutsland is. Aj ien gehiel bint, hej ok meer slagkracht richting de Randstad en in Europa.”
,,Oj nou Drent, Tukker of Achterhoeker bint, dat vuult hetzölfde. De taol en de cultuur bint een mooi bindmiddel. Deur meer samenwarking kun wij het Nedersaksisch klaormaken veur de toekomst. Aj benaodrukt daw allemaol Nedersaksen bint, komp der meer belangstelling veur de taol en hej ok meer kaans um die te beholden.”
Vanof dinsdag is de website Nedersaksisch Platform online, waorop veul meer hierover te vinden is.
