De rubriek Hier kom ik weg is een samenwarking met het Huus van de Taol en giet over Drenten en heur verhalen. Bert Kamping (49) oet Emmen is muzikant, liedtiesschriever zangdocent en directeur van de streektaolstichting Reur, die het jaorlijkse Drèents Liedtiesfestival organiseert.
Nao ien jaor afwezigheid deur het coronavirus is het Drèents Liedtiesfestival der dit jaor weer. Op Hemelvaortsdag, 13 mei, wordt de negende editie live oetzunden op RTV Drenthe vanoet het Atlas Theater in Emmen.
Hier kom ik weg
Bert Kamping is al een hiele tied gangs met de veurbereidingen. Zölf is de geboren en getogen Ermer al haost een olde rot in het vak. Op zien 14 begunt e met zang- en gitaarles en vanof zien pubertied zit e met kameraoden van schoel in een band.
Nao het conservatorium warkt e veul in het commerciële circuit. Hij speult met bands op grote bedriefsfeesten en begeleidt as sessiemuzikant een hiele koppel binnen- en boetenlaandse artiesten, bijveurbeeld bij optredens op radio en tv.
Per toeval in het Drèents
Zölf maakt Kamping in 2007 en 2008 twie Drèentstaolige cd’s. Hij prat van kinds of an al in de streektaol, maor het schrieven en zingen in het Drèents begunde per toeval. ,,Ik weur beld deur RTV Drenthe dat ze veur een programma nog op zuuk waren naor een Drèentse act. Toen he’k een stuk of drei liedties schreven en die he’k speuld. Zo ontstun het idee um mien eerste album te maken.”
,,Ik vun het hiel mooi um te doen. Toen ik an het knooien gung met het Drèents, markte ik ok dat ik best veul slechte dinger schreven har in het Engels. Het gevuul overbrengen, wat zo belangriek is bij muziek, lukt feitelijk allent goed in de taol waor aj met opgruid bint.”
Groter bereik
De Drèentse muziek bestiet op dat moment veural oet lusterliedties, vaak op een cabareteske manier oetvoerd. Kamping wil meer richting de bandtiesmuziek, ok um de streektaolmuziek antrekkelijker te maken veur jongern.
,,Maor dat was nei en betiekende da’k haost nargens terecht kun um te speulen. Toen dacht ik: der möt wal wat gebeuren um een pad te banen veur Drèentse muzikanten die muziek maken wilt veur jongere generaties.”
Hij bedenkt – destieds as metwarker van het Huus van de Taol - het Drèents Liedtiesfestival um een podium te bieden an een zo bried meugelk scala streektaolmuzikanten. ,,En aj een nei publiek anboren wilt, moej ok kiezen veur een aander medium, in dit geval tv en internet. Dan is je bereik ok veul groter as in een theaterzaal.”
Netwark van artiesten
Undertussen zit de stichting Reur in een Europees netwark van organisaties die gangs bint met streektaolmuziek. ,,Het Drèents Liedtiesfestival is een veurbeeld veur organisaties in bijveurbeeld Duutslaand en Italië.”
Dit jaor bint der 34 inzendingen binnenkommen van muzikanten die de winnaar Leon Moorman oet 2019 opvolgen wilt. ,,Wij kiekt echt naor verneiende muziek. Wa’k ok hiel mooi vind is dat der aal meer een serieus netwark ontstiet van artiesten die mekaor kent van het DLF en gaot samenwarken. Dat wil de stichting Reur ok geern.Dat niet elkenien op zien eigen eilandtie zitten blef.”
Reur döt wel meer as het DLF, maor alles is richt op muziek. ,,Dat is toch ien van de beste manieren um jongern met de streektaol te bereiken. Wij laot de muziek spreken.”
