Baukje Bloemert levert ook een bijdrage. Foto: Huus van de Taol
De rubriek Hier kom ik weg is een samenwarking met het Huus van de Taol en giet over Drenten en heur verhalen. Baukje Bloemert (66) oet Zuudwolde hef al hiel wat teksten en manuscripten veur Drèentse boeken, bundels en aandere publicaties veurbij zien kommen, de leste 12,5 jaor. Op 1 juni stopt ze as redacteur bij oetgeverij Het Drentse Boek; ze giet met pensioen.
Ik was zu’n kiend dat de eerste bladzieden van heur favoriete boek uut de kop kende.” Baukje Bloemert lacht. Het zat der al vrog in en nog altied les ze naor eigen zeggen ‘alles wat los en vast zit’. Veul manuscripten en teksten veur pubicaties hef ze in hoes lezen. ,,Mien wark en mien leven loopt hiel arg in mekaar over. Ik heb al met veul schrievers in bad elegen.”
Het Drentse Boek hef al hiel wat boeken oetgeven en Bloemert is daornaost under meer verantwoordelijk veur de invulling van de literatuurpagina’s in het tiedschrift Zinnig van het Huus van de Taol, waor de oetgeverij underdiel van is. ,,Mar ik blief het hiel bewust Het Drentse Boek numen. Wij hebt een status aparte en die moew holden. Wij moet de Dreintse schrieverij blieven anjagen.”
De schoonheid van de streektaal
Bloemert is geboren en getogen in Zuudwolde en Drèentstaolig opvoed. As ze later as lerares in het veurtgezet speciaal underwies in Hoogeveen warkt, is plat praoten met de collega’s not done. ,,Tot directeur Rieks Siebering, die Dreintse gedichten schref, mij vreug of ik naor een tekst van hum kieken wol. Toen gung der een wereld veur mij open. Vanof dat moment bin ik de schoonheid van de streektaal gaon zien.”
,,Ik bin spijtoptant. Ik har der juust veul muite veur edaone um perfect Nederlands te kunnen spreken. Of der laotdunkend edaon wordde over plat praoten destieds? Veur mien gevuul wel. Vrogger op de legere schoele al.”
Respect veur schrievers
Deur Siebering is Bloemert in de wereld van de Drèentse ‘schrieverij’ belaand. Naost het lezen en beoordelen van manuscripten, wat ze samen dee met een manuscriptencommissie, hef ze ok schriefcursussen geven en Drèentse schriefwedstrieden organiseerd. ,,Wij hebt der nou een Nedersaksische wedstried van emaakt, zodat iederiene uut het Nedersaksisch taalgebied mitandoen kan. Ik viend het hiel belangriek dat schrievers uut het hiele gebied mekaar inspireren kunt.”
Over heur veurkeuren veur Drèentse schrievers lat ze zuch niet oet. ,,Ik heb enorm veul respect veur elke schriever, die iets schref vanuut zuchzölf. Daj zoveule moed hebt, daj oezolf zó bloot duurt te geven, wat het eindrisseltaat ok is; respect.”
Drèentse teksten op straot
Roelie Koobs oet Möppelt, die veul warkervaring hef in de oetegeverswereld, volgt Bloemert op. An heur um derveur te zörgen dat der genog aandacht besteed blef worden an Drèentse literatuur. ,,Wat ik hiel mooi vienden zul, is as der meer Dreintse teksten in de openbare ruumte komt, zoas op viaducten en bruggen. Dan kuj de schoonheid van de taal an meinsen laoten zien, zonder dat ze der wat veur hoeven doen.”
,,Der bint zoveule mooie regels. Wie döt mij wat vandage van Daniël Lohues bijveurbeeld of Het gromt op kowlaanddiek van Geertje Enting. Daor hej geliek een beeld en een gevuul bij. Een billboard met teksten langs de A28, dat zul het mooist wezen, haha. En dan alle weken een aandere tekst derop.”
