Marga Heres: 'A’k deink an Drenthe, deink ik eerst an de taol' Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Marga Heres woont al heur hiele leven op de Smildes. As lifestyle-coördinator bij Kits Primair zet ze zuch in veur streektaol in het underwies.
Hoe vaak heur ie niet dat de kinder die op schoel de mieste ondeugd oethaalt later veur de klas komt te staon? Marga Heres (41) van de Smilde is daor een veurbeeld van. Ze was aordig rebels op de mavo in Diever. Lachend: „Wij hebt in een tussenuur wel ies een complete Chinese riesttaofel laoten anrukken.”
Toen ze ies een schoelboek vergoeden mus umdat der ezelsoren an de bladzieden zaten, bedung ze dat ze het boek dan ok hebben much. „Ik heb het veur de schoele in braand steuken. Maor misschien moej dat niet opschrieven.”
Jan Ligthartschool
Heres is geboren en getogen op d’Olde Smilde. De streektaol kreg ze van heur pap, opa en oma met. „Het was oes kent oes daor. Iederien in het dörp kende mien oma, die zuch fanatiek inzette veur de voetbalclub en mien opa die dat dee bij de iesbaan. Ik heb een hiel mooie jeugd had. Wij bouwden boomhutten, reden op skelters en ik voetbalde met de jongen. Nee, ik was gien ‘meisje-meisje’.”
Hier kom ik weg
Umdat ze arg creatief is, sprek de pabo heur an. Dat blek een schot in de roos. As juf gef Heres lange tied les an de vroggere Jan Ligthartschool in Beilen en an de Prinses Margietschool op de Smilde. Later volgt IKC Zuiderenk in Wiester. „Daor volgde ik een meester op die der al veertig jaor an schoele stun. Ik was eerst ‘die neie’, dat was wennen.”
Maor het giet vrij rap. „Het is een schoel met hiel veul doe-kinder. Daor hol ik erg van. Ie hebt tegenwoordig plusklassen veur intelligente leerlingen, maor ik heb meer met de klusklassen.”
Drèents kwartiertie
In Wiester holdt ze geregeld een Drèents kwartiertie in groep 7/8; een körte Drèentse les. „Undertussen gungen de underwiesmethoden van reken en spelling mij aal meer tegenstaon. Die theoretische lessen sloekten alle tied op en dan scheuten dingen as het Dreints derbij in. Dat vun ik jammer, want ik geleuf derin daj dingen het beste leren kunt deur ze te doen. Wij leeft ja ok niet uut een boek.”
De vacature veur lifestyle-coördinator binnen heur underwieskoepel Kits Primair in Midden-Drenthe waor Heres in 2018 op solliciteerd, is heur op het lief schreven. Ze bedenkt nou met een collega de lesprogramma’s veur talentontwikkeling veur alle elf schoelen van Kits Primair. Daorunder valt bijveurbeeld techniek-, maor ok cultuurlessen.
Ze giet met kinder van alle schoelen hen musea of het Drents Archief. „Het giet under andere um erfgoed. Daor heurt het Dreints ok bij.” Ze kreg heur collega’s die veur de klas staot enthousiast um streektaollessen te gaon geven. In meert giet dat, in samenwarking met het Huus van de Taol, op alle Kits Primair-schoelen gebeuren.
Brune bonen
Heres hoopt dat heur collega’s inspireerd wordt um vaker dat soort lessen te gaon geven. „Ok veur Dreintse geschiedenis mag meer aandacht kommen. Ik stun lest met een klas bij het bield van Bartje in het Drents Archief en vertelde wie of dat was, wussen sommige kinder niet iens wat brune bonen bint!”
„A’k deink an Drenthe, deink ik eerst an de taol. Meinsen magt ok best heuren waor aj weg komt. Aj hen Limburg op vekaansie gaot, hebt de meinsen daor ok een Limburgs accent. Mooi toch? Ie huuft je ofkomst niet te verlochen, hè!”
