Wim Boers eigen programma begunt maandag; hij möt veur het eerst wel Nederlands praoten op de radio. Foto: RTV Drenthe/Fred van Os
De rubriek Hier kom ik weg is een samenwarking met het Huus van de Taol en giet over Drenten en heur verhalen. Sinds zien tienerjaoren is Wim Boer oet Wiester dj, maor vanof volgende week hef e veur het eerst in zien leven een dagelijks radioprogramma.
Hoe of e het vinden zul om een eigen programma te gaon maken. Die vraog van heufdredacteur Dink Binnendijk van RTV Drenthe zag Wim Boer (57) niet ankommen. „Nou dat mus wel even laanden. Ja, niet lang heur. Nao een paar uur was ik der wel uut. Uuteindelijk is het veur mij een jongensdreum die nao virtig jaor uutkomp.”
Op zien 17e begunt Boer as discjockey bij discotheek Skopje in Beilen. Muziek kreg e as kind op de boerderij in Hooghaolen veural met via de radio en zien oldste breur, die een pick-up hef. „Op zundagaovend lusterde ik in bed vaak naor de muziek van Radio Luxemburg. Ok stun tiedens het eten De Avondspits van Frits Spits altied an.”
Hier kom ik weg
De eerste stappies op het dj-pad zet e in jeugdsoos All Skin in Hooghaolen, waor e de dreeitaofel en de microfoon ontdekt. „En in het dörpshoes was alle zaoterdagaovends discotheek Scala Calypso. As ik daor een plaotie anvreug en ze hadden hum niet, haalde ik mien eigen op, maor dan wilde ik hum wal zölf ankondigen, haha.”
Volle dansvloer bespeulen
Bij Skopje warkt Boer oeteindelijk zu’n negen jaor. „Mien vrienden verklaorden mij veur gek, umdat ik niet met gung stappen. ‘Jullie geeft 100 gulden uut en ik krieg 100 gulden, dus eigenlijk verdien ik 200 gulden’, zee ik. Populair bij de wichter? Ja, dat was ik ok wel”, gniest e. „Mangs kwam der een wichie bij mij staon die meer wol as allent praoten.”
De wat introverte Boer hef al snel deur hoe aj een dansvloer met 1000 tot 1200 man kunt bespeulen. „Met de muziek kuj de sfeer bepalen en veraandern, dat is hiel mooi um te doen.”
Nao zien Skopje-tied giet Boer nog jaorenlang met een drive-in show op pad, naost zien wark op under meer de bloemenveiling in Eelde en bij een fotozaak. „Ik heb wal ies een bandje opstuurd naor Radio Veronica um daor te solliciteren, maor de ienege reactie die ik terugkreeg was da’k een accent har.”
Koffie en Keuvelen
Een accent héf e ok, want van hoes oet hef Boer altied Drèents praot. „Met vrienden en op schoel dee ik ok wel Nederlands heur, en as dj sowieso. Toen ik in 2010 bij RTV Drenthe op zaoterdagmörgen Tussen stoet en koffie prissenteren gung, mus ik trouwens echt umschakeln. Drèents praoten veur de microfoon was ik niet wend.”
De leste jaoren hef e bij het UWV in Grunning warkt en op zaoterdagmörgen was e ien van de prissentatoren van Hemmeltied op Radio Drenthe. „In dat programma hej leuke interactie met de lusteraar. Der hangt een soort huuskamersfeer. Zo wil ik het ok geern in mien eigen programma. Niet te strak. Het giet ok Koffie en Keuvelen heten, dat zeg genog. Muziek en luchtige informatie staot centraal.”
Het eerste uur bestiet puur oet Nederpop, daorna komp ok aandere muziek an bod. Het giet veurnamelijk um muziek oet de jaoren ’60, ’70 en ’80 en ok wel wat grotere hits van dit moment. „De voertaol wordt Nederlands. Al zal ik wal Drèents praoten as het kan. Nederlands zal wel weer wennen worden. Ik heb de leste weken al oefend. Maor ik blief de ‘en’ insloeken. Keurig ABN praoten past mij gewoon niet.”
