Ronald Buld: 'Laot ze mar denken dat wij domme boeren bint' | Hier kom ik weg

Wat Ronald Buld (46) allemaol döt? Daor kuj wel een wasliest met vullen. Sinds 2,5 jaor is e beheerder van dörpshoes De Buddingehof in Runerwold. Daornaost is e zölfstandig undernimmer.

Under de numer Multie Buldtie levert e creatief maotwark, zoas het streamen van eindmusicals op schoelen. Ok zit e bij de plaotselijke undernimmersveriening, het zummerfeestbestuur én daornaost is e ok nog streektaolambassadeur veur het Huus van de Taol.

 

,,Ik wordde al feliciteerd mit mien neie baan, haha. Maar het Drèents promoten, dat he’k altied al edaone. Het is wie a’k bin. En dat geldt veur alles. Ik doe best veul dingen, maor het vuult niet as wark”, zeg e met een lichte kater van een feest de aovend veur oes gesprek.

Buld is haost gien aovend in hoes en stiet altied an, vertelt e. Dat geldt ok veur de rest van zien gezin. Samen met zien vrouw Karin hef e veer kinder. ,,Dat bint ok allemaole nachtdieren, net as heur olders. Wij gaot nooit hen huus”, gniest e.

Buld weur 24 jaor leden laandelijk bekend toen e met zien band Titt’n een hit scoorde met Ben je geil of wil je een koekje? Lange tied reisd’e –n naost zien wark as hovenier – hiel Nederland deur veur optredens. Drei optredens op een aovend gaven ze mangs; een rock-‘n- roll-leven met gillende fans en veul draank.

,,Wij wordden toen letterlijk eleefd. Het was een hiel gekke periode, waorin ik soms niet normaal over straot kunde. Ik ware dervan in de war. Wij drunken ok hiel veul in die tied. Achterof bekeken waren wij toen zwaor alcoholist.”

Tegenwoordig is zien leven, as dörpshoesbeheerder met een gezin, een stuk minder extreem, maor optreden döt e nog altied. Met de band KaramBAM zet Buld zu’n tachtig maol per jaor ‘een feesttent op de kop’, zoas e het zölf nuumt.

,,Muziek he’k mit de pap- en mamlepel inegeuten kregen. Mien pap zung bij een koor en mien mam zat bij het cabaretgezelschap Boerenblond. Der stun altied muziek an thuus. Dat is bij oens nou nog altied zo.”

Buld is een kartrekker. ,,Ok dat is genetisch bepaold, maar het stiet wel altied in het tieken van een aander, niet um zölf in de belangstelling te staon.” Drèents praoten heurt net zo goed bij hum. ,,Daor bin ik met opegruid. Ik hebbe mij der ok nooit veur eschaamd. In de tied van Titt’n wordde der hiel vaak de draak esteuken mit oenze komaf. Laot ze allemaol mar denken dat wij domme boeren bint, dacht ik. De verstaandigsten hadden wel in de gaten dat zij dommer waren as wij.”

Jaorenlang zat Buld in de organisatie van het Drèents Liedties Festival. ,,Toen Isa Swart en Leon Moorman met-an deden, dacht ik: op zu’n level wil ik ok wel een nummer maken.”

Optreden met rustige liedties in theaters en dörpshoezen is dreum van hum. Maor eerst is e as streektaolambassadeur plannen an het maken veur activiteiten. ,,De streektaol promoten kan op allerlei manieren, allent hier in het dörpshuus al. Ik heb ideeën zat.”