Gert Lubbers oet Daolen: 'Gesprekken in het Drèents vuult geliekweerdig' | hier kom ik weg

,,Hier kom ik weg en hier zal ik blieven”, zeg Gert Lubbers stellig an het begun van het gesprek. Hij wil nooit meer vort oet Drenthe. Vief jaor hef e in Grunning woond veur zien studie agrarische economie en dat was ‘t. ,,Ik zat in de klas bij veul jongen oet Drenthe die net as ik van de boerderij kwamen. Wij preuten ok vaak gewoon plat.”

Lubbers komp oet Benneveld. Zien olders hebt eerst een gemengd bedrief, later akkerbouw en dreugbloemen. ,,Mien breur hef de boerderij overnummen en is stopt met de dreugbloemen, maor sinds een paar jaor hef e ze weer. Ze bint weer in. ‘Stofnusten’ wordt wal ies zegd, dat vin ik een mooi Drèents woord”, lacht e.

Op zien kantoor an hoes in Daolen stiet een vitrine vol met John Deere-trekkerties. ,,Het trekkermark waormet ik opgruid bin. Der stiet ien blauwe tussen: een Ford. Die he’k kregen van een klant die mij plaogen wol.”

Lubbers is agrarisch makelaar bij Agriteam Makelaars en Taxateurs en hef een eigen kantoor. Tot vieftien jaor leden hef e bij verzekeraar Univé warkt. ,,Daor mus ik op pad um boeren as klant binnen te halen. Dan koj dus bij boeren die aj niet kent. A’k dan bij iene kwam, preut ik altied Drèents en vertöl ik da’k zölf ok van de boerderij kom. Dan markt ze daj weet waor aj over praot en dan hej de helft al wunnen.”

Deur het Drèents is der gauw een klik, markt Lubbers. Dat is in het wark wat e nou döt niet aans. ,,Ik vuul mij as een vis in het water, want ik kan haost altied Drèents praoten. Gesprekken vuult dan geliekweerdig. Der is gien verschil in rangen en standen; ie zit op hetzölfde niveau.”

As agrarisch makelaar verkoopt e haost allent maor panden waor een agrarische bestemming op zit en waor aandere regels veur geldt as veur gewone hoezen en grond. ,,Grondhandel vin’k ok machtig mooi um te doen. Je an de haand van bodemkaorten verdiepen in grondsoorten en bodemstructuren is mooi wark en ik mag graag handel drieven.”

,,Hier in Zuudoost-Drenthe hej bijveurbeeld veldpodzolgrond, beekeerdgrond en madeveengrond. Der bint wal meer as twintig bodemtypen. Veurig jaor he’k veur het eerst meer as 150 bunder in ien jaor verkocht. Der bint tegenwoordig veul particulieren op de markt die grond koopt as investering.”

Bij de verkoop van boerenbedrieven komt vaak veul emotie kieken. ,,Op de opleiding leer ie niks over hoe aj daor met umgaon moet. Dat leer ie in de praktiek. As iene veul muite hef met de verkoop, gao’k ok gauwer een keer extra der hen in plaots van da’k bel. ‘Wij bint de sociale makelaars’, zee een collega ooit.”

Ok as het op emoties ankomp, komp de streektaol goed van pas. ,,Maor ik kom ok wel bij particulieren die gien Drèents kunt. Dan probeer ik zo goed meugelk Nederlands te praoten. In hoes? Daor praot ik plat. Ok tegen de kinder. Mien vrouw prat wel Nederlands tegen ze.” Hij lacht vanneis: ,,Ik vin het ok belangriek dat ze dat goed kunt, maor ik wil Drèents praoten.”