Mickey Bakker: 'Ik bin een ander persoon op het podium'. Eigen foto
De rubriek Hier kom ik weg is een samenwarking met het Huus van de Taol en giet over Drenten en heur verhalen. Drèents is Mickey Bakker zien eerste taol. Met zien band Trekhawk mak e ok Drèentstaolige boerenrock.
Overdag warkt e as leraar an het Esdal Vakcollege in Emmen, maor ’s aovends is Mickey Bakker (26) oet Oranjedörp een rockmuzikant die met de band Trekhawk feesttenten en podia op de kop zet. „Ik bin een ander persoon op het podium. Dan ren ik hen en weer en spring ik en doe ik gek, terwijl ik aans hiel rustig bin. Maor ik heb wel leerd daj de energie die aj geeft, ok terugkriegt van het publiek.”
Overstap op basgitaar
Bakker kwam in 2017 bij boerenrockband Dolly en zien Tarrels. De toenmaolige frontman kend’e van jamsessies in een kroeg op Erica. Toen de bassist vertrökken was, mus der een neie kommen. Bakker speulde vanof zien 10e jaor gitaar, maor gien bas. „Dat is echt wel hiel aans. As bassist moej continu op de drums letten. Aj samen niet strak speult, dondert de hiele zooi in mekaar”, gniest e.
De overstap gung hum goed of. „Ik was ok echt vereerd toen ik vraogd weur veur Dolly en zien Tarrels. Al gauw markte ik dat het een stel goede muzikanten was.” Gitarist en zanger Jasper Welink, die bij het gesprek zit, lacht. „Ik dacht daj gungen zeggen: dat het een stellegie waailappen was.”
Samen met Welink nimt Bakker de leadzang over as frontman Ferdy Doldersum eind 2018 stopt. „Strontzenuwachtig was ik toen ik de eerste keer zingen mus. Dat was ok nog in een knoeperd van een feesttent. Ik dacht: dit wordt hielemaol niks.”
Hier kom ik weg
In 2019 giet de band, met een neie gitarist derbij, wieder as Trekhawk. De naam is een Drèents-Engelse woordgrap, het repertoire is Drèentse boerenrock. Ze hebt eigen nummers, zoas Geen stress, geen tied, Lul van een vent en Kom ie hier niet weg en warkt an nei materiaal. Bij optredens speult ze ok nummers van Normaal en Jovink en de Voederbietels.
Roeg
Bakker is geboren en getogen op Oranjedörp. „Mien pap hef altied Drèents tegen mij praot en mien mam Nederlands. Vanof da’k hen de middelbare schoel in Klazienaveen gung, he’k haost allent maor Drèents praot. Daor waren allemaol jongen die dat deden. Ik dèenk ok Drèents. Ik vuul mij meer een Drent as een Nederlander.”
„Ik vind het ok wel belangriek dat jongern Drèents praoten blieft en trots bint op de streektaol”, zeg e beslist. In de feesttenten waor ze speult wordt de streektaolnummers luudkeels metzungen. „Boerenrock wordt deur de mieste mèensen associeerd met feest.”
Nao de coronatied, waorin haost niks kun, vindt Bakker het fantastisch um weer op te treden. Of het er roeg an toe giet? Der giet aordig wat bier deur. „En we kriegt van vrouwen ok wel ies een anbod daw ofslaon moet”, lacht Bakker. „Wat ik ok roeg vin is daw een olde brandweerauto kocht hebt, compleet met sirenes, um naor oeze optredens te gaon.”
Daornaost vindt e het mooi um veur de klas te staon. Hij gef het vak dienstverlening en producten. „Ik bin zölf ok vmbo-leerling west. Ik kan lezen en schrieven met die jongen.” Deurbreken met de band zal wel een dreum blieven, verwacht e. „Maor wij hoopt nog veul mooie dingen te beleven en net zolang deur te gaon as de Stones. Tot wij der dood bij neervalt.”
