Martin Eising woont in Slien en gruide op in Erm. Foto: Rabobank
De rubriek Hier kom ik weg is een samenwarking met het Huus van de Taol en giet over Drenten en heur verhalen. Agrarische bedriefsverzörging leek Martin Eising oet Slien as kind een mooi vak. Vaak was e op de boerderij te vinden. Hij is directeur van de Rabobank worden, maor de agrarische wereld hef nog altied zien interesse.
„Ik heb bliekbaar ‘agri’ op mien veurheufd staon, want ik kom daor altied weer bij uut”, lacht Martin Eising (50). In zien carrière bij de Rabobank komt de agrarische sector altied terug, vertelt e op het bankkantoor in Emmen.
As coöperatief directeur bij Rabobank Groningen Drenthe is Eising verantwoordelijk veur Het Drentse land; de regio Börger, Emmen, Coevern en Hoogeveen. Daornaost is e gangs met de thema’s Banking for Food, waor de agrarische sector under valt, en duurzaam wonen.
Het past hum as een jas. „Ik heb wel wat boerenbloed. Mien va en moe komt beiden van de boerderij. Ik zölf niet, maor vanof mien 6e was ik veul op de boerderij van mèensen in Erm, waor ik geboren en getogen bin. Agrarische bedriefsverzörging leek mij mooi um te doen later.” Dat e oeteindelijk Landbouweconomie en Melkveehouderij zul gaon studeren in Grunning, wus e toen nog niet.
Melkbus schieten
Eising kek terug op een mooie jeugd in Erm. „Mien breurs, kameraoden en ik bouwden hutten in het bos en ’s winters scheuvelden wij op het Ermerstrand. Met old en nei gungen wij melkbus schieten en met Paosen bouwden we een paosbult. Vaste prik. Die tradities bint der gelukkig nog. Het zul zunde wezen as die verdwient.”
Hier kom ik weg
Drèents is zien eerste taol. As kind preut e het altied en nóg döt e het veul. „Drèents verleer ie nooit. Toen ik 22 jaor leden begunde bij de Rabobank in Beilen as accountmanager agrarisch markte ik hoe handig het was da’k plat preut. Aj met boeren Drèents praot, hej geliek een klik. Dat prat gewoon makkelijker.”
Binnen de bank hef e op veul plekken warkt. Sinds een jaor is e coöperatief directeur, maor Drèents praoten döt e ok op het wark nog altied, met mèensen die dat ok doet. „In huus is het niet aans. Mien dochters van 13 en 16 begunt nou ok soms wat Drèentse dingen te zeggen. Haha, prachtig vin ik dat.”
Rieden in de mist
De unzekere tieden in de agrarische sector gaot hum an het hart. Hij sprek veul met boeren. „Ik gao geregeld met accountmanagers met op gesprek, maor boeren belt mij ok wel op of ik ies wil kommen praoten as ze met vraogen zit op financieel gebied. Dan gao ik der hen, dat vind ik ok mooi um te doen.”
„Der zit hiel veul emotie in de sector en dat is niet meer as terecht. Het is niet zo dat wij as bank niet meer investeren wilt trouwens, maor de ondudelijkheid over het overheidsbeleid mak het lastig. Wij vergeliekt het vaak met rieden in de mist. Is het dan verstandig um in te halen? Dat soort gesprekken hew.”
Ontspannen döt Eising deur haost dagelijks op de wielrenfiets te stappen. Naor metalmuziek lustern en hen concerten gaon döt e ok geern. „Maor as bankdirecteur hold je wark ok niet um vief uur ’s middags op. Aj bij een sportverieniging zit of op een dörpsfeest bint; mèensen weet wat aj doet en spreekt je an. Ik vin daj altied jezölf wezen moet. En Drèents praoten heurt daor veur mij bij.”
