Erika Karst: 'Ie kunt het wichie wel uut Drenthe halen, mar Drenthe niet uut het wichie' | Hier kom ik weg

Ze möt lachen as ze terugdèenkt an de eerste cd die ze oetbracht, in 1985. Drèentse kinderliedties, schreven deur heur mam en breur René, het bekende Duo Karst. Zingen in de streektaol, dat döt Erika Karst (50) nou niet meer. Het past heur niet, zeg ze. „Mien pap vun het vrogger ok niet mooi a’k Dreints preut. ‘Dat past niet bij oe’, zee e dan.”

Ze dee het vrogger in hoes wal. „Mar mien mam vun het ok belangriek dat wij accentloos Nederlands praoten kunden. Ze dacht dat wij daordeur verder zulden kommen in het leven. Dat was toen wel vake de opvatting.”

Tien jaor leden verhoesde Karst veur de liefde hen Hilversum. Tegenwoordig woont ze met heur 16-jaorige zeun in Loosdrecht. Plat praoten is ze nog altied niet verleerd. „Mien mam zee altied: ‘Ie kunt het wichie wel uut Drenthe halen, mar Drenthe niet uut het wichie’. En zo vuul ik dat ok. Ik blief een Drent.”

Weerum verhoezen wil ze niet. „Mar ik kome der graag. Toen ik in Londen woonde, belde ik mien mam geregeld en dan preuten wij Dreints. Dat gaf mij het gevuul van thuus. Nou weet ik: oen thuus maak ie zölf. Mien thuus is waor mien zeun is.”

De tied in Londen, zu’n twintig jaor leden, was niet de mooiste oet heur leven. Ze woonde daor met heur toenmaolige man, een platenbaos, en warkte an een internationale zangcarrière. Ze har een luxeleven, maor achterof was ze stokongelukkig. „Ik bin nou zoveul gelukkiger”, zeg ze an taofel in heur bovenwoning in Loosdrecht. Ze warkt in een winkel. Optreden döt ze niet zo vaak meer.

Ok heur zangcarrière in Nederland – in 2009 bracht ze Als je maar gelooft in mij en Ik zie jou oet – is niet worden wat ze dervan hoopt har. Maor verbitterd is ze niet. „Natuurlijk ha’k het graag anders eziene, mar het succes hef bij mij niet deurezet, zoas bij René. Misschien is het ok verschil in persoon. Mien breur giet altied stoïcijns deur, is niet kapot te kriegen. Ik lig der wakker van a’k kritiek kriege en bin veul eerder bange da’k faal.”

„Succes in de muziek hef hiel veul te maken met geluk; de juuste personen treffen op het juuste moment. René is deurebreuken met Liever te dik in de kist, mar dat nummer is as geintie ontstaon in een hotellobby.”

Is ze stiekem wal ies jaloers op het succes van heur breur? „Die vraog ha’k een keer verwacht, mar het is totaal niet zo. Ik vin het geweldig veur hum. Het giet zo hard met hum!” Zölf is ze naor eigen zeggen vörmd daor wat ze metmaakt hef. „Zoas ze in het Engels mooi zegt: We came out of the battle better, not bitter.

Ze zöt wal wat der op heur pad komt, zeg ze. Ze schref wel veur aandere artiesten en der bint ok wel muzikale plannen. „Ons hart ligt bij de countrymuziek. René en ik wilt nog een keer een album met countryduetten opnimmen. Meinsen vraogt daor ok naor. Ze heurt oes graag samen zingen. Oeze stemmen kleurt mooi bij mekaar. Dat album, dat giet der wel een keer komen.”