„Zu’n old mèens as ik wilt ze toch niet, dacht ik.” Ieneke Draaijers (63) lacht. Tot heur stomme verbaozing weur de Hesselse toch oetkeuzen as ien van de heufdpersonen in de serie ‘Op de spoed’. Ok probeerde ze spoedeisende hulparts en prissentator Gor wat Drèents bij te brengen.
„Ik weur iniens herkend. En soms nog.” Dat Op de spoed van ’t veurjaor massaal bekeken is, hef Ieneke Draaijers (63) oet Hesseln markt. „Een dag nao de eerste oetzending sprak iederien in de supermarkt mij an. Hiel mooi, maor ik was ok wat overdunderd. Ik vergat de helft van de bosschuppen.”
Bieten of krootjes
Dik 39 jaor leden weur ze verpleegkundige in het Scheper Ziekenhuis in Emmen. 27 jaor warkte Draaijers op de intensive care (ic) en nou alweer jaoren op de spoedofdieling.
„De patiënten die het ziekst bint vin ik het leukst. Dat klinkt gek, maor daor kuj het mieste met en veur doen um te zörgen dat ze beter wordt”, zeg Draaijers. „Het veurdiel van de spoed is dat de mieste patiënten gewoon praoten kunt. Op de ic moej vaak op aandere manieren communiceren, as mèensen an de beaodeming ligt bijveurbeeld.”
Hier kom ik weg
Van hoes oet prat ze plat, ok al was heur pap een Rotterdammer. „Hij logeerde as kind ’s zommers op een boerderij op Kibbelveen. Vanof zien 15e is e der bleven. Daor hef e Drèents leerd. Maor as opa en oma oet Rotterdam later bij oes waren, preut pap wel Rotterdams tegen heur. „Rooie bieten waren dan ‘krootjes’ en wortels ‘peentjes’, haha.”
Baord derof
Ieneke Draaijers is trouwd en mamme van drei kinder. Ze is geboren in Ens en opgruid in een boerengezin in Slien. Nao de mavo in Hesseln döt ze de opleiding verpleegkunde in Hoogeveen.
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
„Ik preut altied plat, ok met vriendinnen, maor op schoel preuten wij Nederlands. Tiedens een stage in het ziekenhoes van Coevern vergiste ik mij een maol. Het bezuuk veur een patiënt vreug in het Drèents waor e wezen mus en ik preut plat terug. Ik kreeg geliek de baord derof van de heufdzuster. Die belde hen schoel; ik mus op Nederlandse les, vun ze.”
„Het grappige was da’k in Hoogeveen Nederlands har van Marga Kool, die juust pro-Drèents is. Ze har in ien middag wal bekeken da’k gien bijles huufde.”
Draaijers: 'Op een gegeven moment mark ie niet meer dat die tv-ploeg der is.' Foto: Boudewijn Benting
Tegenwoordig wordt streektaolgebroek in de zörg juust zien as een veurdiel bij plat praotende patiënten; het contact is beter. Draaijers was te zien in een Facebookfilmpie waorin ze Op de spoed-prissentator Gor, die van Armeense ofkomst is, Drèents probeerde te leren. „Hilarisch. Elke keer a’k het weer zag, mus ik zo vreselijk lachen.”
De Vlinderprinses
Dat de Hesselse selecteerd weur as ien van de heufdpersonen veur het programma har ze niet dacht. „Zu’n old mèens wilt ze toch niet, dacht ik, maor het leek mij wel mooi.” Ze gaf zuch op naodat ze veurig jaor september een rol speuld har in theaterspektakel De Vlinderprinses bij Sweel. ,,Ik dacht: wat kan mij het schelen, ik heb ok al veur zeuvendoezend man speuld.”
Nou hef ze optreden veur een miljoenenpubliek. „De serie was veur mij de kers op de taart nao zowat virtig jaor in de zörg. Ze hebt drei maond filmd. Op een gegeven moment mark ie niet meer dat die tv-ploeg der is; je doet gewoon je wark. Het programma is een prachtige weergave worden van hoe wij as team warkt. Daw in de top 7 stunden van de Televizierring-verkiezing, daor bin ik ok hiel trots op.”
