Eduard Annen: 'In het Dreints hej een makkelijker gesprek' Foto: Gemeente Meppel/Jaco Hoeve Fotografie
De rubriek Hier kom ik weg is een samenwarking met het Huus van de Taol en giet over Drenten en heur verhalen. Eduard Annen oet Möppelt warkt bij de Samenwerkingsorganisatie De Wolden Hoogeveen, is fractieleider van Sterk Meppel en streektaolambassadeur in zien woonplaots.
Jaorenlang was Eduard Annen badmister in het zwembad in Rune. Hiel wat kinder hebt zwemmen leerd van de Möppeler. „Of ik geliefd ware? Niet altied. Ik ware hiel streng. Ik heb van mien olden discipline mit-ekregen en dat paste ik ok toe in het zwembad.”
„Ik bin met collega-raodsleden een keer mit de politie in Möppelt mit-ewest tiedens een horecanacht. De agent die de briefing deu, har ik vrogger een keer het zwembad uut-etrapt. ‘Dizze man is de ienege die mij ooit een trap onder de kont egeven hef’, zee e. Hij was het nooit vergeten. En die collega’s lachen!”
Zeun van de gruunteboer
Annen (58) is geboren op Noordscheschut en opgruid in de wiek Krakeel in Hoogeveen. Zien mam was wiekverpleegkundige en zien pap gruunteboer. ,,Ik kiek terug op een mooie, zörgeloze jeugd. Bij ons thuus weur altied Dreints epraot. Nederlands he’k op schoel eleerd.”
Hier kom ik weg
Nao zien wark a badmister weur e coördinator sportaccommodaties bij de gemiente De Wolden. Tegenwoordig is e under andere Arbocoördinator veur de gemienten De Wolden en Hoogeveen, die nauw samenwarkt.
Agressie en geweld
Humor en lol met zien collega’s hebben, vindt Annen belangriek, maor zien taken nimt e bloedserieus. „As Arbocoördinator hol ik mij bijveurbeeld bezig mit agressie en geweld tegen mitwarkers. Meinsen die zuch hier misdraogt, die collega’s uutscheldt of intimideert, kriegt met mij te maken. Vaak gaow mit ze in gesprek. De streektaal komt daorbij hiel erg van pas.”
,,As meinsen Dreints kunt, praot ik ok plat. Dan hej een makkelijker gesprek. ‘Man, ie mut ies een keer opholden te zeuren, dat gedonder mut stoppen’ kan ik zo tegen een Drent zeggen. Dat warkt goed.” As streektaolambassadeur drag e het Drèents ok geern oet in leukere situaties. „Ik vien het de mooiste taal die as der is.”
Mont Ventoux-liefde
Annen hef lang in Rune woond, maor verhoesde zu’n twaalf jaor leden hen Möppelt. Nao twee scheidingen zat e een tied niet goed in zien vel. „Ik gung hen een coach en wij spraken een paar doelen of. Ien daorvan was mitdoen an Groot Verzet Tegen Kanker en de Mont Ventoux op fietsen. Zo zul ik alle shit achter mij laoten en a’k op de top ware, zul mien neie leven begunnen. Ienmaol boven kwamen der een bult emoties lös. Toen a’k beneden ware, zat ik der deurhen. Drei dames hebt mij mit uut eten eneumen die aovend, ze stunden derop dat ik mitgung. Ien van die drei was Jacqueline.”
Hij kende heur al een poosie, maor dan slat de vonk over. „Op 11-03-2011 biw trouwd. Het eerste huwelijk dat voortkwam uut de Mont Ventoux-actie”, lacht e. Deur Jacqueline komp Annen in Möppelt terecht. „Ik heb het stadje in mien hart esleuten. Ik vule mij daor heerlijk en huuf der niet meer weg.”
Met Jacqueline mak e geregeld fietsvekaansies naor verre laanden. Wieder hef e het knap drok met de politiek. ,,Umdat wij as Sterk Meppel nao de verkiezingen in meert de grootste partij wordden, mus ik de collegeonderhandelingen leiden. Ik har goeie adviseurs, mar vun het wel spannend. En a’k dan bedeinke da’k begund bin as zwemleraar en da’k nou het college van B&W in Möppelt mug vörmen, dan is dat best bizar. Dat ha’k nooit dacht!”
