Siemen Wachtmeester oet Nietap: 'Ik bin trots da'k gewoon Drèents praoten kan' | Hier kom ik weg

As geboren Elemiet is de streektaol Siemen Wachtmeester (52) met de paplepel ingeuten. „Tot mien 14e bin ik op-egruid op Elim. Toen binne wij verhuusd hen Veenhuzen. Mien pap was eerst bouwvakker, mar kun in het gevangenisdörp an de slag bij defensie. Het was een hiele overgang van het bescharmde Elim naor Veenhuzen.”

Van Elim hadden veul kinder in het gevangenisdörp nog nooit heurd. „Net in die zomer stun der een stuk in de kraante over een maagie dat lastig-evallen was in een tillefooncel deur iene op een brommer. ‘Oh, dus dat is Elim?’ vreugen ze. ‘Ja, zee ik, ‘Mar Elim is ok gewoon voetballen, mouwen opstropen en niet lullen mar poetsen’.”

Wachtmeester giet hen het lager beroepsonderwijs (lbo) in Oosterwolde. Hij wil zien pap opvolgen in de bouw. Koken lek hum ok hiel mooi. „Mar de decaan in Oosterwolde zee da’k beter eerst een vak leren kun. Koken kun ik later nog ies leren met een cursus.”

Veur de bouw blek e niet geschikt. Op het Middelbaar Dienstverlenende Gezondheidsonderwijs (mdgo) in Assen leert e op de opleiding Consumptieve techniek en Civiele Dienst oeteindelijk koken en alles over gastvrijheid. Waor zien veurliefde veur het koken vortkomp, wet e niet, maor kok worden in een instellingskeuken lek Wachtmeester as tiener geweldig.

Nao de neudige opleidingen en een baan as voedingsassistent in verpleeghoes Anholt in Assen komp zien dreum oet. Hij giet daor an de slag as kok en is daornao acht jaor teamleider keuken. „Ik har snel in de gaten dat het ansturen en begeleiden van de koks en zörgen dat alles in de keuken goed eregeld wordde, hielemaol mien ding was.”

Hoe langer en enthousiaster Wachtmeester prat, hoe meer de Elimse klaanken heurbaar wordt. Nao Veenhoezen hef e lang in Leek woond. „Ik bin vrij gevulig veur accenten. Ik wark nou tien jaor in De Hoprank in Peize en daor praot ze weer hiel aans Drèents as vrogger bij oes in huus. Ik doe zo mit, mar ik bin en blief een Elemiet. Dat vuult ok echt zo. Daor kom ik weg.”

Nou woont e alweer een poosie met zien vrouw in Nietap. „Weer in Drenthe wonen vuult goed. Het is hier wat dörpser en gemoedelijker as in Leek.”

As teamleider facilitair is Wachtmeester verantwoordelijk veur De Hoprank in Peize en veur de wasserij van Interzorg in Assen. Op zien wark is de streektaol altied van pas kommen. „Het zörgen veur mèensen, dat lag mij al toen ik 31 jaor leden begunde as voedingsassistent en dat is niet veraanderd. Op oeze verneide locatie De Hoprank kende ik alle bewoners binnen de körtste keren bij naam. Ik vinne het belangriek dat ik weet wie wie is, a’k deur het gebouw loop. En as ze Drèents praot – en dat doet de miesten daor – dan doe ik dat ok.”

Het neie ontmoetingscentrum in De Hoprank het niet veur niks het Naoberhoes. „Gevuulsmatig hej al gauw een band aj plat praot. Mèensen waardeert het ok. Net zoas da’k der trots op bin da’k Elemiet bin, bin ik der trots op da’k gewoon Drèents praoten kan. Ok veul collega’s doet het. Het brengt de glimlach op het gezicht van de bewoners.”