Niek Hunse oet Beilen: 'Aj as boer staot veur je zaak, dan koj veur jezölf op' | Hier kom ik weg

„Mien kameraoden hadden lest een filmpie maakt: beelden van mien pap die op tv was toen e in de jaoren ’90 actievoerde bij de Domo en daorna beelden van mij bij een protestactie. ‘De geschiedenis herhaalt zuch al mooi’, zeden ze derbij.”

Niek Hunse (26) lacht. In zien kantoor annex kantine kan e de koestal overzien. 180 koenen telt het bedrief. In de schuur dernaost zit 22.500 kippen, die ophokt bint vanwege de vogelgriep. Ok bint der zörgen met wat veur stikstofplannen het kabinet komt nao het rapport van Remkes. Gien gemakkelijke tieden veur een jonge boer, maor Hunse is gien klager.

Hij gruide op tussen de dieren en hef nooit aans weten as dat e boer worden zul. „As kleuter lag ik wal ies bij de kukens in de stal. Dan leupen ze over mij hen”, lacht e. Vrogger reed e al op zien traptrekker over het erf, de plek waor e nog altied woont. Zien vriendin warkt boeten de deur en ok op de boerderij. „Ja, wij bint echt een boerenstel en dat vin ik ok mooi, samen de boerderij doen.”

De vrijheid diej as boer en eigen baos hebt, vindt Hunse machtig mooi. „An de aandere kaant: ie moet wel alle dagen wat, puur umdaj dieren hebt. Een koppel vrienden hef ok een eigen bedrief, maor die zegt met old en nei: wij warkt vandaag niet. Ik moet ’s aovends altied nog hen huus um de koenen te voeren. Dat vun ik in het begun wel ies lastig.”

Hunse hef metdaon an meerdere boerenprotestacties, zoas het blokkeren van het Jumbo-distributiecentrum in Beilen. „Ik vin: aj staot veur je zaak, dan koj veur jezölf op. Maor wij vunden het wel belangriek dat het netties verlopen zul. Toen oes vraogd weur de volgende mörgen te stoppen, bint der wel woorden vallen. Sommigen wolden staonblieven tot de ME kwam. ‘En dan koj met je kop op tv en stikt het hier van de pers um vast te leggen dat wij hier wegveegd wordt. Woj dat?’ he’k vraogd. Wij wolden dat niet.”

Hij is der trots op dat het netties verlopen is. „Ik heb zölf ok met burgemeester Bijl spreuken. Aj zo stoer bint um daor te staon, moej ok het lef hebben um fatsoenlijk het gesprek an te gaon. Daorum bin ik ok hen de inloopaovend veur boeren uut Midden-Drenthe op het gemeentehuus gaon. Daor kunden wij praoten met de politiek. Schreeuwen met tien man achter je makkelijk, maor ien op ien je verhaal fatsoenlijk doen en je kwetsbaar opstellen, da’s veul moeilijker.”

As brandweerman hef Hunse ok wel braandties blussen moeten van actievoeders. Maor de braandstichters bint zölf juust gien boeren, is zien overtuging. Netties actievoeren is veur hum hiel belangriek. „As brandweerman he’k ok een veurbeeldfunctie. A’k bij het carbidschieten met oldjaor een holten pallet op het vuur gooi, heur ik mèensen al zeggen: ‘Oh, die braandweermannen wilt wel fikkie stoken, hè!’”

Hij hef keuzen veur de vrijwillige brandweer umdat e aans as boer haost altied op zien arf is. „Dan wordt je wereldtie wel klein. En ik hol van actie en aandere mèensen helpen. Ik kan het doen, deurdat ik daags bij huus bin, dus waorum zul ik het dan niet doen?”