De rubriek Hier kom ik weg is een samenwarking met het Huus van de Taol en giet over Drenten en heur verhalen. Luc Lugies uut Hesseln is vrachtwagenchauffeur. In de bietencampagne red hij de Drèentse sukerbieten naor de sukerfabriek in Hoogkerk.
„Hartstikke mooi om hierop te kunnen rieden.“ Luc Lugies (1966) wes naor de vrachtwagen achter hum. „Nog gien 27.000 kilometer op de teller!” Met dizze neie wagen red Lugies veur de firma Wigchers uut Skonnerd de bietencampagne.
350 ton sukerbieten per vrachtwagen per etmaol
Boeren zèeien in ’t veurjaor sukerbieten in, die in ’t najaor oogst worden. Het laden en het transport van de bieten vanof de percelen naor de sukerfabriek en alle planning en logistiek daor umtoe wordt de bietencampagne nuumd.
Hier kom ik weg
„Die löp van half september tot an half januari”, zeg Lugies. As e een dagdienst hef, giet e tussen vier en vief uur ’s mörgens van berre. Zien maot belt hum en zeg naor welke bult bieten e rieden mut. Die bulten liggen grofweg in de driehoek tussen Hoogeveen, Emmen en Assen. Daor lost Lugies zien maot of. De bieten worden met de shovel of een kraan in de vrachtwagen laden. „In ien dienst rie ik vier tot vief keer naor de fabriek in Hoogkerk en weerum. Dat komp neer op het vervoer van 350 ton sukerbieten per vrachtwagen per etmaol.”
Van die sukerbieten maken ze in de sukerfabriek niet allent sukerproducten veur consumenten en bedrieven, maor der worden bijveurbeeld ok restproducten verwarkt tot veevoer.
Internationaol transport
Veurdat e vier jaor leden bij Wigchers de bietencampagne rieden gung, hef Lugies as zölfstandig chauffeur hiel wat internationale ritten reden. „Mien vrouw hef vrogger ok heur groot riebewies haald.” Lugies vindt het mooi dat zij dat daon hef: „As die wat in ’t heufd hef, giet ze der serieus met gangs.” Lugies reed toen veul naor Duutslaand en Noorwegen. „Dat was mooi. Dan waren we met het gezin op pad en lagen de kinder lekker op berre in de cabine.”
Lugies hef zien taolenpakket goed veur mekaor. „Ien van mien kameraoden is Rotterdammer,” Lugies zet een Rotterdams accent op: „hé, joh Luukie!” Iniens prat de Drent hartstikke westers. „Ik praot ok Duuts, Engels en Italiaans. Alles met een Drèents accent. Wat niet lukt doe’k met haanden en voeten. En aordig wezen in de vrömde, altied aordig wezen. Dan koj ’n hiel eind.”
Luc Lugies zit volop in de bietencampagne. Foto: Boudewijn Benting
De geur van de eerde
De Hesseler holdt van zien dörp. „Ik ben bestuurlid bij VIOS, de voetbalverieniging bij oes in Hesseln en ik ben ok leider van het darde elftal.” Midden in de bietencampagne hef e haost gien tied veur aandere dingen, maor veur Oldejaorsverieniging De Donderbussen mak Lugies met old en nei altied even tied. „Dan bin ik drok met het Rad van Fortuin!” lacht de chauffeur. „Maor ik moet wel op tied op berre, want de bietencampagne giet 24 uur per dag deur.”
Lugies holdt van Hesseln, het dörp waor e groot worden is en de umgeving. „Weej wat ok mooi is? Aj ’s mörgens vrog bij ’t Maantingerveld of bij Gies op ’t laand bint, dat der een eerappelrooier red en wij bieten an ’t laden bint; de geur van die grond.” Lugies zucht. „De geur van de eerde. Ja, dat is de geur van ’t plattelaand.”
