Parapenter Bart Bosker uut Assen: 'Drenthe is zo mooi van boven' | Hier kom ik weg

„Der zit hier wel slangen heur!” röp geboren Assenaar Bart Bosker as e deur een weiland achter ’t huus van zien partner in Eel löp. „Jaoren leden hef iene, die slangen veur de hobby har, ze uutzet. Lest hung der een rattenslang an de klink van de achterdeur”, lacht e. Hij is veur de duvel niet bang en dat komp goed uut aj geern parapenten.

Bosker (59) is lid van Parapente Noord Nederland. Een verieniging veur parapenters waor aj joen brevetten halen kunnen en die vliegdaogen organiseert. Parapenten numen ze ok wel paragliding. De parapenter zit met zien uutrusting en een paraglide - een soort parachute - vast an een kabel. Die zit weer vast an een lier. An die lier gaoj as parapenter de lucht in. Aj op hoogte bennen, giet de kabel lös en vlieg je zölf.

Iederiene die geern iens met de lucht in wil, kan zuch daorveur anmelden op de webstee van Parapente Noord Nederland. „Dan doej een tandemvlucht en zit ie vast an een ervaren parapenter.” De verieniging mak gebruuk van liervelden in de previncie Drenthe. „Maor wij gaot ok wel iens met leden naor het buutenland, Oostenriek bijveurbeeld.”

„We vliegt meesttieds vanof het lierveld bij Eeserveen. De boer van wie het veld is, kreg hierveur een vergoeding. De samenwarking met boeren uut de regio is goed, het is altied mooi aj een veld gebruken mag als lierveld. Landen maj overal, net as met een luchtballon.”

Rond Eeserveen hej een zandofgraving, bossen, akkers en weilanden. „Het is mooi aj de percelen vanuut de lucht ziet. Je kiekt ok aans as aj op de grond staot.” Zo kuj an de maisvelden zien hoe as de termiek, de opgaonde warme lucht, is. „Zie je de mais op een bepaalde manier vanuut het midden bewegen, as een soort luchtbel, dan moej daor boven vliegen. Dat is het punt waoras de warme lucht opstijgt. Termiek dus. En daor kuj met je paraglider lang op vliegen.” Dat is ok de reden dat Bosker ’t liefst ’s zummers vlög. De beter de termiek, hoe langer e in de lucht blieven kan.

„Och jongens. Drenthe is zó mooi van boven. Daor kan ik echt emotioneel van worden”, zeg Bosker met rooie ogen. „’t Neie Hemelriek, de Kibbelkoele en de bossen, het bint stuk voor stuk prachtige plekken.” De stilte in de lucht vindt Bosker heerlijk. Soms vlög der een hoendervalk naost hum. Bosker lacht. „Dan kek e mij zo an van: wat doe jij hier?”

Bosker is een muziekliefhebber en drumt in twee bands. As jonkie van 12 jaor old gung e al met zien pap en mam naor de TT-nacht. Hij stund dan veuran bij ‘t podium op ’t Koopmansplein in Assen. „Toen wus ik al: a’k laoter groot ben, wil ik daor staon. A’k nou op het TT Festival met mien band op de Brink speul, zie ik ok jonkies staon kieken. Dan denk ik: gao doen wat aj mooi vindt.”

Joen haart volgen is veur Bosker ’t belangriekste dat der is. „Gao der op of. Mörgen kan alles aans wezen.”