Streektaolambassadeur en old-plietsieagent Bert Eefting: ‘Negen van de tien keer was Drents praoten een schot in de roos’ | Hier kom ik weg

Bert Eefting (62) en zien vrouw Jenneke woont sinds 1992 op Nieuweroord, körtbij Nei-Baoling, het dörp waor ze allebeide vort komt. „Nou ja, ik bin geboren in Maanting, waor mien pap en mam een boerderij hadden, maar deur de ruilverkaveling bint we op mien 4e hier op Nei-Baoling terecht-ekomen”, vertelt e.

„Ik praote vaak twee varianten Drents deur mekaar hen. Thuus bin ik op-evoed met het Drents van de Broekstreek, maor in het dörp he’k de variant van Nei-Baoling mit-ekregen. Toen ik achttien jaor eleden wiekagent weur in Börk, de Broekstreek en umgeving he’k ok die variant weer op-epikt”, legt Eefting uut.

„In mien wark he’k der veul profijt van ehad dat ik beide dialecten spreek. Ik bin bijveurbeeld wiekagent e-west op Elim, Noordscheschut en Hollandscheveld. Daor kwam het Drents dat ik kende van Nei-Baoling goed van pas.” Aj de taol van het gebied spreekt, hej meer ansluting met de inwoners, is zien ervaring.

Zien carrière as agent begunt op zien 19e in Zwartsluus. „Ik vuulde mij geliek thuus. Het dialect ligt hiel stief tegen het Drents an en ik har geliek wel in de gaten dat ik mij daor niet in het Nederlands huufde uut te drukken.”

Eefting warkt later een antal jaor in Rune en Zuudwolde. „As agent waj ningtig procent van je tied op straote, veul meer as nou. In die tied kun iederien het plietsiebureau in een dörp binnenlopen um angifte te doen. Tegenwoordig moej soms twee week wachten. Gien-iene bij de plietsie is daor bliede met, maar het is niet aans.”

„Aj wiekagent bint, lig het wark op straote. Ie kunt soms nog de kleine dingen doen veur de burger, op kleine schaal wat betieken. Dat vun ik mooi”, vertelt e wieder. „De plietsie hef zuch aal meer terug-etrökken uut de maatschappij. Grote zaken kriegt veul andacht, wat ok möt, maor daordeur wordt de kleinere wel ies vergeten. Ik sprung graag in dat gat, deur het oplössen van burenruzies bijveurbeeld.”

As e nao zes jaor as wiekagent in Hollandscheveld en umgeving kan overstappen naor zien geboortestreek, grep e die kans. „Börk en de Broekstreek ligt mij nog meer nao an ‘t hart. Ik kende de mensen in mien gebied. De miesten vunden het mooi dat ze met mij plat kunden praoten.”

„Aj thuus komt bij mensen, hej hiel gauw in de gaten oj bij Drenten of bij nei-Drenten bint. Ik begunde het gesprek altied in het Drents en a’k markte dat het niet goed völ, schakelde ik over. Maar negen van de tien keer was plat praoten een schot in de roos. Ik markte dat de ofstand onderling kleiner wordt. Vaak speulden der emoties mit - het gung over diefstallen, conflicten of geweld – en as het um gevuul giet, kunt mensen zuch in heur moerstaol het beste uutdrukken.”

In april gung Eefting nao 44,5 jaor met pensioen. Nou is e streektaolambassadeur in Midden-Drenthe. „Dat past mij goed. Veur mien gevuul begunt de taol ok under jongern weer wat meer te leven. Toen ik op de plietsieschoel in Harlingen zat, schaamde ik mij een beetie veur mien ofkomst en verbörg ik mien accent in het begun. Dat is aans worden; ie huuft je zeker niet meer te schamen veur je Drentse accent.”