Burgemister Klaas Smid van Noordenveld: 'Zo gauw a’k plat praote, wordt de ofstaand kleiner' | Hier kom ik weg

Klaas Smid (64) is in Hoogeveen, of - zoas e zölf zeg - op ’t Hogeveine, grootbracht met de streektaol. Ok as burgemister prat e geregeld plat. Lachend: „Maar ik kriege wel es te heuren: ‘Ie praot aans Dreints as wij hier’. Ja, in Noordenveld wordt hiel aans espreuken. Hier zegt ze ‘hoes’ in plaots van ‘huus’ en gien ‘iederiene’, maar ‘elk-en-ain’. Het hef wat meer weg van het Grunnings.”

De oldste burgemister van Drenthe komp oet een arbeidersgezin en gruide op in de Verzetsbuurt. „Nao schoele deden we de olde kleren an en gungen wij voetballen”, vertelt e op zien kamer in het gemientehoes in Roon. Zien tien jaor oldere breur is profvoetballer worden. Zölf speult e jaorenlang veur VV Hoogeveen.

Smid: „Ik kun goed leren, maar in die tied was het niet gebrukelijk daj as arbeidersjong gungen studeren. Mien olders hebt dat wel stimuleerd. Zij wolden dat wij het beter zulden kriegen as zij. Mien mam kun ok goed leren, maar mus as maagie van 12 jaor al uut warken. Ik bin begund op de mavo en eindigd op het vwo. Daorna he’k geschiedenis studeerd in Grunning. Ik was de eerste in de familie die kun studeren.”

De interesse veur politiek ontstund op de middelbare schoel. „Die belangstelling was der bij ons thuus ok wel. Het was de tied van Joop den Uyl. In hum had mien va veul vertrouwen. As Den Uyl het zee, was ’t zo. Ik bin zölf op mien 18e lid eworden van de PvdA.”

Van 1990 tot 2003 zit Smid in de gemienteraod van Hoogeveen, waornao e as raodsgriffier an de slag giet in Hardenbarg. In 2006 wordt e veur het eerst wetholder in Hoogeveen. Nao twee periodes van veer jaor raakt e in 2014 zien baan kwiet as de PvdA bij de gemienteraodsverkiezingen een grote nederlaag led. „Poeh, dat was een dieptepunt. Ik heb mij ok wel ies zörgen emeuken waor of ik terechte komen zul.”

Het wordt Ommen, waor e in 2015 vanneis wetholder wordt. Maor tiedens een loopbaantraject is ok zien interesse in het burgemisterschap wekt. De vacature die dat jaor vrijkomp in Noordenveld sprek hum an en zo verlaot hij en zien vrouw veur het eerst in heur leven Hoogeveen.

„Wij bint in Rowol terecht-ekomen en hebt ons daor vanof dag ien thuus-evuuld. Of der verschillen bint tussen Noordenveld en ’t Hogeveine? De meinsen bint hier wat bourgondischer en ze bint ok meer ericht op Grunning, maar de Dreintse mentaliteit is wel geliek.”

In zien wark as wetholder in Hoogeveen preut Smid geregeld plat. „Veural met inwoners was dat hiel prettig. Hier doe’k het ok, bijveurbeeld mit stellen die 60 of 70 jaor etrouwd bint en plat praot. Dan hej een aander gesprek. Veul meinsen kiekt toch wat tegen burgemisters op, ok al binne wij hiel gewone meinsen. Zo gauw a’k plat praote, wordt de ofstaand kleiner.”

Hoe lang e nog burgemister blef, wet e nog niet. „Ik marke da’k echt bijkomen moet nao een drokke week. Vrogger kun ik langer deurgaon. Maar zolang a’k der energie van kriege en de meinsen in mien umgeving het nog op pries stelt da’k der bin, gao ik deur.”