Marien Renting van ’t Zwien in Gies: 'Ik kan niet zunder dieren' | Hier kom ik weg

As kind was e al gek op dieren. Hij har een schaop en kreeg as tiener drei biggen kedo toen de motte op een boerenbedrief in Gies dood gaon was. Marien Renting bracht de dierties zölf groot in de hoeskamer, met biest van de koenen.

Niet vaak is de titel van dizze rubriek zo letterlijk van toepassing op iene. „Ik bin daor, achter dat muurtie geboren. Dus ik kom echt hier weg”, wes de 56-jaorige Gieser vanoet de keuken richting de woonkamer.

Renting wol boer worden, maor het bedrief van zien olders was te klein um over te nimmen. „Dus weur ik bedriefsverzörger. Zo kan ik toch boer wezen, bij aandern.” As bedriefsverzörger helpt e boeren die as bijveurbeeld ziek bint met het runnen van het bedrief.

Hij hef niet altied in Gies woond. Vief jaor hef e met Riejanne in Schoonebeek deurbracht veur e het hoes van zien olders kocht. Lachend: ,,Daor, in de neibouw hadden wij twei zwienen en drei schaopen bij hoes. Ik kan niet zunder dieren.”

Toen der in Gies een hoesweideproject kwam, met as doel zeldzaome hoesdierrassen terug te brengen in het dörp, keus e veur Bonte Bentheimers. Zwienen vindt e nou ienmaol prachtig. Twaolf jaor later sprek Renting lachend van een oet de haand lopen hobby.

Otje en Lummel waren heur eerste twei zwienties. Otje, die al veur veule naokommelingen zörgd hef, is der nog altied. De baand is te hecht um heur weg te doen. „Lummel is nao ien jaor op wintersport gaon”, gniest Renting. Hij is slacht en zien vleis is verkocht.

Nou is de familie Renting de grootste Bonte Bentheimer-fokker van oes laand. De jonge dieren gaot nao ien jaor hen de slager. Het vleis verkoopt ze in heur winkel ’t Zwien, die ze een jaor of zeuven leden begund bint. „Wij slacht nou alle weken gemiddeld ien zwien um oeze veurraod in de winkel op peil te holden.”

Renting brengt de dieren zölf hen de slager, naodat ze een jaor lang bijna altied boeten lopen hebt. Veul vreten en lekker in de modder rollen; de zwienen komt niks tekört en bint publiekstrekkers in Gies. „Dat wegbrengen, daor he’k gien last van. Zo warkt het aj een bedrief hebben wilt. Wij weet dat ze een goed leven had hebt.”

„In oeze winkel verkoop wij alles van de varkens, ok de poten en het vet, de kaonties. Het is kringlooplandbouw en hartstikke duurzaam”, vertelt e wieder. Ze hebt ok koppelties zwienen op aandere plekken lopen, zoas bij Landal Aelderholt in Aalden waor ze de Japanse doezendknoop bestriedt.

De familie giet mangs ok met wat biggies de boer op, op bezuuk bij een tehoes met dementerende oldern bijveurbeeld. Die kunt dan knuffeln. Ok geeft ze geregeld rondleidingen, waorbij der vaak veul knuffeld wordt. „Knuffeln vindt veul mèensen mooi. Ikzölf ok nog altied. Een autistische jongen die hier in het dörp op de camping stun, kwam in zien vekaansie alle dagen even tegen ien van oeze zeugen anliggen. Daor weur e rustig van. Prachtig toch?”