Bakker Sjoerd Jellema oet Zwindern: ‘Drèents is een underdeel van wie ik bin’ | Hier kom ik weg

„Toen ik veur de eerste maol bij Bakkerij Faber in Hoogeveen kwam, stun daor de allerduurste Mercedes die aj veurstellen kunt. De auto van de toenmaolige directeur. En ik kwam daor an met mien afgetrapte Renault, die niet meer starten wol toen a’k wuggung.” Sjoerd Jellema (60) lacht hard. „Ze moet wel dacht hebben: wat is dit veur neie directeur?”

Vieftien jaor is e nou directeur van de bakkerij in Hoogeveen en sinds 2014 ok van Bakkerij Smithuis in Oldenzaal. Aldi is de grootste klant. Dagelijks levert zien bakkerijen verse stoet an 170 supermarktfilialen, die bepaalde soorten ter plekke veur de klanten ofbakt.

„Een vriendin van mien vrouw, die ik al meer as virtig jaor ken, zee lest nog da’k deur de jaoren hen gien spat veraanderd bin. Dat vun ik een groot compliment. Ik bin dan directeur, maor ik bin veul meer van bier en bitterballen as van kaviaar en champagne.”

Jellema verhoest op zien 4de met zien olders vanoet Duutsland hen Schoonebeek. Zien pap was bakker en weur leidinggevende en later directeur bij Bakkerij Hendriks op Nei-Amsterdam. „Hij was Fries en mien moe kwam van Klazienaveen. In huus weur der een soort verbasterd ABN praot, haha. Op schoel en in de kroeg met kameraoden preut ik Drèents.”

Hij wet nog hoe trots zien pap was toen e hen de Bakkersvakschoel in Wageningen gung. ,,Maor hij hef mij nooit bakker zien worden. Op mien 19de is e uut de tied kommen.” Jellema junior leert het vak en giet an de slag bij verscheiden bedrieven in Nederland. Haost altied gelieerd an de bakkerijbranche.

„Ik heb in mien jeugd zestien jaor in Schoonebeek woond, daorna biw veur mien wark zestien jaor wegwest. Van Rotterdam en Oud-Beierland biw via Zwolle weer in Schoonebeek terechtkommen. Dat vuulde as thuuskommen. Wij hebt het in het westen goed naor oeze zin had, maor in Drenthe wonen vuult toch aans. Het leven is daor harder en mèensen bint wat ofstandelijker as hier.”

„In Schoonebeek kun ik mijzölf wezen. De Drèentse taol heurt daor ok bij. Die is underdiel van waor ik weg kom. In Oud-Beierland miste ik wat, markte ik toen ik hier weer was. Dat har ok met de taol te maken. Drèents is underdeel van wie ik bin.”

Veur zien wark giet e in die periode juust veul weg. Hij kreg een baan in de export van margarine, vetten en eulies en reist veul deur Europa en Azië. Hij vindt het prachtig, maor as e vraogd wordt veur de directeursfunctie in Hoogeveen is de keuze gauw maakt. „Ik ontdekte da’k hielemaol ofdwaald was van wat ik het liefste doe: stoet bakken. Dat kun ik toen weer doen gaon in mien vertrouwde umgeving met mèensen die mij nao an het hart ligt.”

Nao weer zestien jaor in Schoonebeek woond te hebben, bint zien vrouw en hij vief jaor leden hen een boerderij in Zwindern verhoesd. Jellema warkt nog altied met veul plezier in Hoogeveen en Oldenzaal. „Ik vind het prachtig um met mien vak an de gang te wezen en producten te ontwikkeln. De streektaol gebruuk ik op het wark ok. Ik wil allent de directeursrol hebben as het möt en dan praot ik Nederlands. Het liefst bin ik underdeel van de metwarkers en praot ik plat.”