Lamert Kieft döt verslag van de gebeurtenissen in zien woonplaots, argens in Zuudwest-Drenthe. Beeld: Coen Berkhout | Midjourney
Verleden week kwam het bestuur der ijsvereniging GIOL (Glijden Is Ons Lust) alhier bijeen in sombere stemmink, daar het al jaren praktisch niet meer vriest.
„Luu, de bane leg der veur de katte zien konte bij”, aldus vz./ijsmr. Ibrahiem de Afrikaanse vluchteling, „ie kun der geweldig mooi op watersurfen, mar scheuveln ho mar. En ’t wordt der niet beter op heur, deur de opwarming van de eerde. Zeker niet nou in Amerika dat Trumpie weer an de macht kump. Die hef niks op mit ‘t klimaat”, aldus vz./ijsmr..
Hij vervolgde: „Wat dat angiet kunne wij oens as iesvereniging net zo goed drekt wel opknuppen, want we kriegt gien scheuvel meer op ’t ies. Nee jonges, ik zie der nog een rare bok van steigern, van die bende.”
„Nouj ’t toch aover dat Trumpie hebt, Ieb hein”, meende het bestuurslidmaat Arend Oosting Ezn, „der wordt beweerd dat e behaalve Panama, Canada en Groenlaand ok Drenthe opkopen wil. ‘Dan kan ik mooi de Duutsers in de gaten holden’, zeg e, ‘want die vertrouw ik dus veur gien iene sojemieter. Ze hebt mij de bek veuls te groot en luu mit ’n grote waffel, daor heb ik mar ’n donderse hèekel an seins’. Kiek, grootkaans is ’t mar gekkigheid, mar ’t is een raar dier, Trump; zo onveurspelbaor as de moord”, aldus Arend Oosting Ezn.
Korting bij de dames
Ondanks het uitblijven van winterse en andere omstandigheden zit de ijsvereniging GIOL goed bij kas. Dit komt vooral doordat bestuurslidmaat/penningmr. Berend Hindriks (Beertje, in de dorpsmond) een lucratieve doch profijtenlijke contract (koppelverkoop) afgesloten heeft met de dames van plezier uit Huize Harmonika alhier. „Luu die as bij oens scheuveln koomt, kriegt korting bij de dames”, aldus Beertje Hindriks.
„Boetendat huurt de dames van oens een ofwarkplakke vlakbie de iesbane, in ’t Waningsbossie en daor doet ze oens per cliënt een mooie vergoeding veur. Dat helpt! Die ofwarkplakke bestiet uut ’n olde camper die as ze in de bossies edrökt hebt, mit ’n matrasse en ‘n elektriek kacheltie derin en hupsakeesie, vooruit mit de geite!”, aldus Beertje Hindriks, welke als garagehoudert van professie, nog weet te melden dat de camper in kwestie een zestienklepper is, met weinig op de teller.
In ‘t blooie gat rondhupsen
„Beer, sorry heur”, meende vz./ijsmr. Ibrahiem de Afrikaanse vluchteling, „mar as der gien ies op de bane leg, dan hebbe wij gien bezoekers en de dames dus ook niet, dus ok gien geld veur oens”, doch bleek dit toch wat anders te liggen. Daar div. cliënten de camper in de bos beschouwt als een extra, doch spannende attractie.
„Ik sprake lestdaags Alie nog”, aldus penningmr. Beertje Hindriks, „Strubben-Alie, de mitwarkend veurvrouwe van Huize Harmonika. Alie zeg ook: ‘Beer, ie hebt gien idee hoeveule manskerels liever ’n ofwarkplekke in de bos hebt as bij oens in ‘t bedrief. ’t Hiele jaor deur, en niet allent bij de winterdag; ies of gien ies. En vrouwgies trouwens ok, vergist oe asteblieft niet. Alleman viendt ‘t een spannend idee, in ’t blooie gat rond te hupsen in ’n zestienkleps camper in de bos en dat der dan elk moment een dikke fazanthane of ’n hert naor binnen loeren kan, weej niet?’ En wij kriegt dus veur elke cliënt helderweg commissie, dus dat löp as ’n tiete”, aldus Beertje Hindriks.
Trumpie aover de vloer
„Laot dat Trumpie mar niet heuren daw hier in Drenthe goed in de dames van plezier zit”, meende het lidmaat Oosting Ezn, „daor is e zelf ok nogal drok op, op zukke dames. As e dommiet Drenthe op ekocht hef, dan hew we hum zelf ook alle dagen aover de vloere hierzoot, zogenaomd um de Duutsers in de gaten te holden. Jaja.”
