Koop Dorst oet Zuudwolde: 'Optreden as tonpraoter is mien grote hobby'

Drenergie en Draccu heet zien beide bedrieven. Of ‘Dr’ oet beide namen nou van Drenthe of van zien achternaam komt, lat Koop Drost (55) in het midden. Wal is het dudelijk dat de geboren Zuudwoldiger zuch slim verbunden vuult met ‘zien’ provincie en de streektaol.

Drost: „Ik praot overal Drents, waor a’k ok bin. Handel hef veul mit de gunfactor te maken. Ik denk dat de streektaol wat dat betreft veur mij altied in positieve zin hef mit-espeuld. In de jaoren 80 en 90 wordde het under leeftiedsgenoten gebrukelijker um Nederlands te praoten, maar daor bin ik altied wars van ebeleven. Ik vien dat vaak gemaakt klinken.”

Beide bedrieven richt zuch op zunne-energie veur heufdzakelijk de agrarische markt. Bij Drenergie giet het um de panelen en bij Draccu um accu’s, waormet bedrieven de energie die de zunnepanelen opwekt zölf opslaon en weer gebroeken kunt.

Drost hef hogere landbouwschoel daon en kwam daornao in de jaoren ningtig in Noord-Braobant in de agrarische sector an het wark. Het har niet veul scheeld of hij was nooit weerum kommen. „Ik had het geweldig naor mien zin daor. Maar het bedrief vreug mij um in Drenthe een bedriefstak op te zetten. Ik was 25, as ze oe dan vraogt, zeg ie gien nee.”

In 2012 begund’e in de zunnepanelenbranche. Het Nederlandse bedrief waor e warkt, komp nao een overname deur een Belg oeteindelijk in Franse handen. ,,Hoe wieder we naor het zuden opscheuven, hoe minder ze mij kunden verstaon. Nao de leste overname dacht ik: ik moet maken da’k wegkoom hier. Toen bin ik in 2020 veur mijzölf begund.”

Intussen warkt zien zeun en dochter veur hum. Drost hef in totaal zestien metwarkers an het wark. Hij bezuukt klaanten deur hiel Nederland, dus hij is veul op pad. Maor niet allent veur zien wark: Drost is ok conferencier, oftewal tonpraoter. „Zo nuumt ze het in Noord-Braobant. In Limburg en Oost-Nederland zegt ze buutreedner”, vertelt e.

Ok dat gebeurt in de streektaol. „In het zuden praot ik wel wat minder plat, maar zölfs as ik viene da’k mooi Nederlands praote, zegt ze daor: ‘Tjonge, wat is Drents toch een mooi dialect’.”

Hij begunde der virtien jaor leden met, toen zien olde voetbalclub in Braobant hum vreug veur een optreden. „Dat was niet hiel spannend, want ik had wel vaker met een microfoon in de haand estaone. Toen zeden ze da’k ies naor het tonpraotcafé in Heeze bij Eindhoven mus gaon.”

Daor prissenteerde Drost zuch in een zaal met leden van virtig carnavalsverienings en met succes. Hij weur vaker vraogd. „Ze vunden het ok mooi dat er ies een aander dialect te heuren was tussen alle Brabantse tonpraoters.”

Tegenwoordig tredt e overal in Nederland op. Hij hef een stuk of wat vaste sketches, die umdebij twintig minuten per stuk duurt. In de wintermaonden, de carnavalstied, hef e het ’t drokst. „Veurig jaor he’k het leste weekend veur carnaval negen optredens in ien weekend egeven. Dan bi’j ’s maandags wel kapot”, lacht e.

„De rest van het jaor treed ik ok op veur aandere clubs en organisaties. Ik wor geregeld evraogd. Dan koom ik mit een aovendvullend programma, waorin ik de breur van de lokale burgemister speule. Die veurstelling maak ik veur elk gezelschap hielemaol op maot. Optreden is echt mien grote hobby.”