Harro Wimmenhove: 'Aj gien muziek meer maakt veur oen wark doet, hej een hobby terug.' Foto: Gerrit Boer
De rubriek Hier kom ik weg is een samenwarking met het Huus van de Taol en giet over Drenten en heur verhalen. Harro Wimmenhove oet Hoogeveen hef tientallen jaoren muzikant west. Hij schref ok Drèentstaolige nummers.
„Tja, virtig jaor rock-‘n-roll lat zien sporen nao”, zeg Harro Wimmenhove (70) as e vertelt dat e hen de audicien west hef. Op zolder tussen zien instrumenten vertelt e oetgebreid over zien belevenissen met bands as No Name, Black Lake en Diep Triest en allerlei theatertours met thema’s as Motown- en sixties-muziek.
Vrogger in hoes weur altied zungen. „Mien pap leidde verschillende koren bij ons op ’t Hogeveine. Mien mam zung bij iene daorvan en mien zusters ok. Zölf he’k nog bij het kinderkoor ezungen”, vertelt e.
Popmuziek
In het acht kinder tellende gezin is het klassieke muziek wat de klok slat. Hij lacht: „Tot mien breur rond mien 10e mit een transistorradiogie in huus kwam. Daor kwam hiel aandere muziek uut, popmuziek.”
Hier kom ik weg
Wimmenhove raakt verslingerd an de muziek van under meer The Beatles en The Beach Boys en pakt het pianospeulen, waor e met stopt was, weer op. „Deur te luustern kun ik de liedties naospeulen op piano. Dat gung best aordig.”
Hij giet speulen in bands as No Name en High More City Seven. Naost piano leert e zuchzölf gitaar en basgitaar speulen. „Bij High More City Seven, een dixielandband, he’k bij straotoptredens ok wel ies mit zu’n wasbord veur de balg elopen”, gniest e.
Black Lake
In 1982 begunt e bij de succesvolle band Black Lake. Achttien jaor lang tredt e meer as honderd maol per jaor op in Nederland en Duutsland. As het antal optredens minder wordt, stapt e over naor smartlap-/rockband Diep Triest, waormet e ok theatertours döt. Gevolg daorvan is dat e ok jaorenlang in aandere muzikale theaterproducties metspeulen mag.
Wimmenhove: „Mar ok optreden kan een sleur worden. Op een gegeven moment hej dat wel eziene. Veur twei keer vieftig minuten speulen in een theater bi’j haost de hiele dag op pad. Alle veurbereidings kost de mieste tied.”
Umliesting
As e vraogd wordt um met te speulen bij de cd-opnames van Duo Dampo (André Damming en Jans Polling) komp Wimmenhove in anraking met streektaolmuziek. Hij speult later ok met op albums van under anderen Egbert Meyers en Harm en Roelof. „Veur die lesten meuk ik ok de arrangementen. Ik bin altied gek ewest op mooie arrangementen trouwens. Het is de umliesting van de muziek. Ik holle van harmonisch gezellige dingen en meerstemmige zang. Een singer-songwriter mit allent een gitaar vin ik hiel saai.”
Harro Wimmenhove: 'Schrieven in het Drèents vuult hiel eigen.' Foto: Gerrit Boer
Veur zien leste band de Rockfanfare schref e zölf een nummer in de streektaol veur dielname an het Drèents Liedtiesfestival. Dat bevalt hum zo goed dat e het ok veur aandere streektaolartiesten doen giet. „Schrieven in het Drèents vuult hiel eigen. Der is ok hiel veul mooie streektaolmuziek, van Daniël Lohues of Jan Henk de Groot bijveurbeeld. Weej wat het is? Dat giet oe net wat meer in de botten zitten. Het komp dichterbij as Nederlaands. De leste jaoren, tot net nao mien pensioen, he’k ewarkt as taxichauffeur. Ok toen he’k veul an de streektaal ehad. As ik mit klaanten plat gung praoten, kwam ik ok een beetie dichterbij.”
Wimmenhove is tegenwoordig haost alle dagen wel een poosie op zolder te vinden. Muziek maken en schrieven döt e nou veur de lol. „Aj het niet meer veur oen wark doet, dan hej een hobby terug.”
