Mindert van der Velde van d'Olde Smilde: 'Aj goed bent veur aandern, bent ze ok goed veur je'

„Het dörp betiekent veul veur mij. Ik woon hier haost vieftig jaor en wil hier ok blieven.” Mindert van der Velde (76) zit op een stoel bij het raam in zien woonkamer in d’Olde Smilde. Even eerder hef e verteld dat zien vrouw Minie zeuven week leden hen een verzörgingshoes gaon is. Alzheimer. „De leste twee jaor he’k heur zeven daegen in de weeke verzörgd.”

Het is wennen, zeg e. „Wat scheelt, is daw der altied open en eerlijk over praot hebt. Wij hebt daordeur veul steun kregen van dörpsgeneuten. D’Olde Smilde is een sociaal dörp.”

Deur het mantelzörgen hef de deurgewinterde vrijwilliger de leste jaoren wat minder taken op zuch nummen. Maor veurzitter van Dorpsbelangen Hoogersmilde is e nog altied. Dat döt Van der Velde nou zo’n virtien jaor. Ok is e al jaoren betrökken bij een vrijwilligersgroep die under meer gruunonderhold en aandere klussen döt in het dörp.

Mindert van der Velde is geboren in Old-Appelscha. As jongste van vief kinder gruit e op op een keuterboerderij met wat laand en wat vee. „Wij preuten thuus Stellingswarfs, haost hetzölfde as wat ze in dit diel van Drenthe praot.”

Nao vanof zien 13e warkt te hebben bij een paar boeren en later bij een grondwarkbedrief, giet en in de jaoren 70 as knaolwarker bij de provincie an de slag. Hij woont dan met Minie en heur drei kinder in de sluuswachterwoning an het Oranjekanaal op d’Olde Smilde. „Ik deu het sluus- en waeterbeheer, maar meeide ok barms en snuide bomen.”

Later hef Van der Velde as kantonnier het beheer over een eigen stuk weg: de N371 langs de Drentse Hoofdvaart. Hij eindigt zien carrière elf jaor leden as toezichtholder grote warken. „Ik was verantwoordelijk veur bijveurbeeld de anpak van de Frieslandroute, de anleg van het bustransferium bij Gieten en as leste veur de anleg van de twee rotondes in de Frieslandroute bij Beilen. Prachtige uutdaegingen. Ik kiek der nog altied met trots naor a’k der langs ried.”

As vrijwilliger hef e in het bestuur zeten van de basisschoel waor zien drei kinder hen gungen en was e veurzitter van de karkenraod. Ok is e actief in de buurt, waor e vanof 1985 woont. „Vrijwilligerswark is mien hobby. Ik heb dat metkregen vanuut huus. Aj goed bent veur aandern, bent ze ok goed veur je. Ik geniet dervan um met meinsen umme te gaon.”

De veurzitter van Dorpsbelangen hamert der bij de gemiente Midden-Drenthe op dat recreatiesector in d’Olde Smilde een boost kriegen möt. „Een paer campings bint verkocht. Haost alle staocaravans bint daor nou weg. De parken wordt verneid, maar dat schöt niet op. De veule toeristen die seizoensplekken hadden en hier vaeke zes maond per jaor woonden, bint der niet meer. Dat slecht veur de leefbaarheid van het dörp.”

Veurige maond heul e een betoog daorover in de gemienteraod, grotendiels in het Drèents. Lachend: „Dan vuul ik mij as een vis in het waeter. Goed Nederlands praoten kan ik niet. Ik zeg altied: ‘Aj mij niet verstaon, vraog het maar an je buurman’. Wij woont hier in Drenthe en dizze tael is hier altied spreuken, waorum zuw dan in ien keer Hooghaarlemmerdieks gaon praoten?”