Janneke Oosting (47) hef een bloemenzaak in Börk: 'Iets wat 40 jaor goed giet, moej niet zomaor veraandern'

Vanof heur 19e warkt ze bij Hilbrands. De bloemenzaak van heur veurgangers Albert en Lies Hilbrands is al roem virtig jaor een begrip in het Börk en de wiede umgeving. „Dat mien man Gert en ik de winkel veurig jaor overnimmen muchten, vuult as een bekroning op alle jaoren da’k der warkt heb”, zeg Janneke Oosting (47) an de keukentaofel in heur hoes an het Oranjekanaol bij Örvelt.

Heur leven speult zuch van kinds of an of in Midden-Drenthe. Ze gruit op Witteveen op as jongste in een boerengezin met negen kinder. As kind helpt ze wal met in het bedrief, maor wat ze zölf worden wil, wet ze lange tied niet.

Leren is niet heur ding. Nao de middelbare schoel döt Oosting een detailhandelopleiding in Assen. Ien dag hen schoel en de rest van de week an het wark bij de gruunteboer in Börk, waor ze dan ok woont. „Ik wol wat met de handen doen. Tiedens mien opleiding kwam ik derachter da’k etaleren mooi vun.”

In 1996 kan ze an de slag in de bloemenwinkel an het Van Weezelplein. Bij Hilbrands leert ze het vak van bloemist. Ze döt deur de jaoren hen alle veurkomende warkzaamheden, van inkoop op de veiling en de verkoop tot het maken van bloemstukken en de inrichting van de winkel. „Wij maakt hiel veul zölf; dat vin ik het mooiste wat er is.”

Hilbrands breidt deur de jaoren hen oet met aal meer decoratiespul en de zaak wordt ok qua grootte oetbreid. „Nog geregeld heure wij klanten die rondloopt verbaosd roepen: ‘Och, het is ja nóg groter!’ of ‘Het holdt niet op’. Dan wies ik op de butendeur en zeg ik: ‘Jawel, aj daor daorhen gaot, holdt het op!” Oosting, een enthousiaste praoter, lacht vanneis oetbundig.

Dat zij en Gert nou samen de zaak met vieftien metwarkers bestiert, mak heur trots. „En deurdat ik altied alles doen much, he’k leerd um dat zölf ok deur te geven an oeze metwarkers. Je moet mèensen vertrouwen en kansen geven. Aans koj niet verder.”

„Da’w verantwoordelijk bint veur vieftien mèensen, daor denk ik niet alle weken bij nao heur. Wij doet het met mekaar, as team”, zeg ze stellig. ,,Of der veul veraanderd is sinds de overname? Nee. Veul klanten hebt het niet markt. Iets wat virtig jaor goed giet, moej niet zomaar veraandern, vin ik.”

Van hoes oet prat Oosting plat. „In de winkel ok wel, maar het ligt deran of ik iene ken of niet. Miesttieds praot ik een mix van Drèents en Nederlands. Ik hol mij niet zo bezig met de taol. Wel bin ik trots daw hier in Drenthe woont. Ik hol van de rust en het gemoedelijke van oeze provincie. A’k op de bloemenveiling in Eelde Grunnegers heur praoten, klinkt dat veul botter, vin ik.”

Hoeveul uur per week ze warkt? „Ik zul het niet weten. Ik heb wel minder tied veur hobby’s. Bij goed weer gao’k nao het wark graag in de tuun an de gang, even de kop leegmaken. Ik stop veul tied en energie in de winkel en dat vin ik hielemaol niet arg. Het is wark en hobby tegeliek.”