Naost heur wark in de uutvaartbranch speult Trea Epping typegies. Foto: Gerrit Boer
De rubriek Hier kom ik weg is een samenwarking met het Huus van de Taol en giet over Drenten en heur verhalen. Trea Epping is aulabeheerder in Sweel. Daornaost speult ze humoristische typegies en lat mèensen schreien van het lachen.
Trea Epping is in 1970 geboren in Elp en gruide op in Aalden. Ze trouwde, kreeg twee kinder en woont nou met heur gezin in Hesseln. „In Hesseln kuj op mekaar reken”, zeg Epping. „Wij let niet op mekaar, wij holdt mekaar in de gaten. In de goeie zin van ’t woord.”
Hier kom ik weg
Heur hiele leven warkt ze in de zörg, waor zij meesttieds Drèents prat. „Ik wark nou op Skonnerd in de thoeszörg. Mèensen die zörg neudig bint, vuult zuch kwetsbaar. Het is mooi aj de drempel verlegen kunt deur in heur eigen taol te praoten.”
Eerder hef Epping in Coevern warkt met mèensen met dementie. „Die verliest aal meer heur körtetermiengeheugen”, leg zij uut. „Iets wat lang leden is, bijveurbeeld heur jeugd, weet zij nog wel goed. Daor heurt de Drèentse taol ok bij.”
Leste verzörging
De Hesselse vun het wark niet zwaor. „Veur de femilie is ’t zwaor. Die hebt der alle daogen met te maken. Zij ziet hoe heur pap of mam achteroet giet. Ik zag in bewoners ok vaak gelukkige mèensen die in heur eigen wereld leefden. As ik naor hoes gung, leut ik het achter mij.”
Collega’s vrugen bij het uut de tied kommen van bewoners vaok of zij ze wassen en ankleden wol. „Iene veur het lest verzörgen, is veur mij een hiele eer.”
Via heur wark in de zörg kwam ze in de uutvaortbranche terecht. Nou warkt Epping ok bij uutvaartverieniging De Laatste Eer in Sweel, waor ze, naost het beheer van de aula, verscheiden taken hef. „Ik kom de overledene wassen en ankleden, doe de controles tiedens de opbaring en ben bij de uutvaort. Het is veur naosten weerdevol dat zij aldeur dezölfde perseun ziet”, zeg Epping.
‘Zo mooi meuglijk’
„Ik wark in zo’n mooi team: de dragers, de klokkenluders en de dames die met de koffie rondgaot... Wij doet oes best um het zo mooi meuglijk verlopen te laoten” vertelt ze wieder. „Ofscheid nimmen kuj maor ien maol doen. Dat moej veur de naosten goed doen.”
De Hesselse hef veul te maken met ziekte en de dood, maor is altied positief. „Ik vin het mooi da’k zoveul veur mèensen betieken kan. Mien leven dreit niet um de dood, maor juust um het leven.”
Olde wieven
Ok al kent veul mèensen heur uut de zörg of van de uutvaarten, aandern hebben Epping in een gehaakt naaktpak op ’t netvlies staon. „Ja man, bij de neijaorsduuk in de Klinkenvlierse plas in Coevern”, lacht ze.
Trea Epping as toiletjuffrouw, zoas ze soms te zien is bij evenementen. Foto: Gerrit Boer
Heur man lat een foto zien: Epping drag een huudskleurige, gehaakte babydoll met gebreide börsten en een angeneid bossie schaamhaor. „Aandere mèensen hebt mij misschien verkleed as toiletjuf achter een rollator op het Oogsfeest in Möppen zien.”
Ok dit carrièrepad komp deur heur wark in de zörg. Met een collega stun zij jaoren leden iens op een underwiesbeurs veur vmbo-leerlingen. „Wij bint toen verkleed as olde wieven die beurs overgaon, in een rolstoel waor een stomazak vol appelsap an hung te klotsen. Toen weurden we vaker vraogd op evenementen.” Ze lacht vanneis. „Een oet de haand lopen hobby.”
