Mark Meijer uut Hesseln: 'Oldjaorsdag is een feest van het hiele dörp' | Hier kom ik weg

„Het is hartstikke mooi um te doen. Mèensen waardeert ’t ienorm.” De 36-jaorige Mark Meijer zit met zien vriendin Melany en zeuntie Mika an de keukentaofel in Hesseln. Meijer stiet op en legt nog even een blok holt in de open heerd. „Oldjaorsdag is een feest van het hiele dörp”, zeg e met lach op ‘t gezicht.

Al carbidknallend het jaor uut, dat doen ze bij De Donderbussen in Hesseln al jaorenlang. Het is dan ok een olde Nedersaksische traditie die in 2014 tot immaterieel cultureel arfgoed uutroepen is.

Dat Meijer een tied veurzitter wezen zol van de oldejaorsverieniging har e as klein jochie nooit bedenken kunnen: „Vrogger huul ik hielemaol niet van vuurwark. Ik leup ies met mien pap in ’t duuster op straot toen de buurman een kippenscheet ofstak, zun rotje dat hielemaol niet hard knalt. Ik schruk mij dood en wus niet hoe snel ik in huus kommen mus.”

Net as veul aandere Hesselers is Meijer opgruid met verscheiden verienigingen en commissies die activiteiten organiseren. „Ik begunde bij jeugdsoos Papparazo. Wij regelden met een koppel jongern het paosvuur.” Dat namen ze hiel serieus. „Wij waakten bij de bult, zodat gieniene hum ansteken kun. Bier derbij, hartstikke gezellig!”

Nou is e al jaoren actief bij De Donderbussen. De Hesselers begunnen in oktober met vergadern over de activiteiten op oldjaorsdag. „Der möt elk jaor een vergunning anvraogd worden veur het carbidschieten, we bint catering neudig en um de activiteiten te bekostigen hold wij verscheiden acties”, legt Meijer uut. „Zo gaow in december altied met bessemstelen vol dreuge worst langs de deuren en verkoop wij donateurskaorten.” Ok regelt de club dat der alle jaoren een karstboom op de brink in Hesseln stiet.

Jaorenlang deuden de leden het carbidschieten zölf op de brink in Hesseln. „Op een gegeven moment was der nog een club jongen die an ’t carbidschieten gung op een veld bij het dörp”, zeg Meijer. „Dat was LNW, een ofkörting veur Lang Niet Wies.” De Donderbussen en LNW besleuten samen te warken.

„Dat giet mooi’, vertelt e wieder. „We hebt nou op oldjaorsdag alles bij mekaar veur de neie loods van de warktugenverieniging an de raand van het dörp: carbidschieten, catering, een Rad van Fortuin met beste priezen en um middernacht een vuurwarkshow.”

Maor De Donderbussen warkt niet allent samen met LNW. Meijer lat op zien tillefoon een filmpie zien en begunt te vertellen over de samenwarking met de plaotselijke meziekverieniging Excelsior. „Toen die een paor jaor leden heur 100-jaorig jubileum hadden, speulden zij een stuk van Tsjaikovski. Mèensen van De Donderbussen knalden op ofgespreuken momenten in het stuk met carbid.”

Dat jong en old samenwarkt in Hesseln, vindt Meijer prachtig. „Goeie activiteiten zörgt veur saamheurigheid. Dat holdt de mèensen in Hesseln.”

Dan hef de 2-jaorige Mika zien stoet op en klimt e uut zien kinderstoel. Het is berregaonstied veur hum. „Of ik denk dat hij later ok zo actief wezen zal veur ’t dörp?” Meijer denkt even nao. „Dat mag e natuurlijk zölf weten, maor ik zul ‘t mooi vinden as ‘t van generaotsie op generaotsie deurgaon zul.”