Martin Hietkamp: 'Ik kan mien gevuul kwiet in mien liedties.' Foto: Huisman Media
De rubriek Hier kom ik weg is een samenwarking met het Huus van de Taol en giet over Drenten en heur verhalen. Singer-songwriter Martin Hietkamp komp van Klazienaveen. Hij vertaolt zien levensverhaol en de geschiedenis van de veengebieden in folkmuziek.
In Stadsknaol rennen een blaffende hond en twee bokkies deur de achtertuun van Martin Hietkamp (1976). „Die bokkies hef mien dochter van de slager red”, zeg Hietkamp lachend. „Met een paor week gaon ze naor een boerderij. Mooi toch?”
Hier kom ik weg
De deur lös hebben en doen waor aj je goed bij vulen, bennen belangriek veur Hietkamp. Dat levensmotto is e kwiet west. In de coronatied vun hij het terug. „Ik was as ICT’er aldeur an het rennen. Op een dag stortte ik in mekaor.”
Hij heurt ambulancepersoneel tegen zien vrouw zeggen dat e gien hartanval hef, maor het kalmer an doen mot. „Burn-out? Midlifecrisis? Tja, zeg het maor. Ik gung bedenken wat der veur mij toe döt en ben een aander pad ingaon.”
Muziekles
As kind har e muziekles op Klazienaveen, in de coronacrisis nam Hietkamp les via internet. „Dan kreeg ik video-opdrachten van hiel goeie muzikaanten. Ik stuurde heur mien filmpies weerum, waor zij op reageerden. Zo kreeg ik op een makkelke manier les van de beste docenten ter wereld.”
Zien ICT-wark döt e nou veul vanuut huus. Zo kan e zuch wieder ontwikkeln in de folkmuziek. „Ik heb verscheiden muziekopdrachten daon.” Hij kek opzied naor zien vrouw en zeg: „En ik heb een fantastische vrouw. As ik twiefel of ik een nei instrument kopen zal, is zij de eerste die zeg da’k het doen mot.”
Martin Hietkamp achter ‘t huus met ien van de bokkies. Foto: Huisman Media
Zien muzikale talenten en zien ICT-ervaring gaven de muzikaant inspiratie um met verscheiden partijen een project te starten. „Wij bouwen een online platform veur muziekles”, zeg e enthousiast. „Een soort Netflix, waor je een abonnement op hebben, maor dan veur het leren bespeulen van instrumenten.”
Drèentse liedties
Daniël Lohues is Hietkamps grote veurbeeld. „Hij denkt met over mien teksten en muziek. Daor ben ik wies met”, zeg Hietkamp trots. „Vrogger wol ik mien accent verdoezeln en vort van Klazienaveen. Nou kan ik mien gevuul juust kwiet in mien Drèentse liedties en zol ik best weer op Klazienaveen wonen willen.”
Hietkamp zingt over het dagelijks leven. „En over mien mamme die slim ziek was.” Veurdat ze uut de tied kwam, hef e het lied veur heur zongen. „Zij was een nuchtere Drèentse, maor het ontroerde heur toch.” Hij slikt. „Ik heb het ok op heur uutvaort zungen.”
Achter ‘t huus
Ankommende tied tred Hietkamp op met neie liedties. „Ik heb mij verdiept in de historie van de veengebieden en die verhaolen mix ik met fantasie en humor.” Het is een verhaol worden dat ofwisseld wordt met muziek in verschillende folkstijlen op verscheiden instrumenten.”
Dan kek de muzikaant deur ’t keukenraom. In de tuun gef zien dochter op een baankie in de zun een bokkie de fles. Hietkamps veurbeeld Lohues zingt het al in ien van zien liedties: ‘Aalles pais en vree hier achter ‘t huus’. Hietkamp glimlacht: „Ik zol haost zeggen, jao ’t mag wel zo.”
