Harold Kamps: 'Beilen vuult echt as mien thuus.' Foto: Gerrit Boer
„Ik bin hier in Beilen opgruid, maor ik bin geboren in het ziekenhuus in Assen. Dat is het ienige smetje”, lacht Harold Kamps. De 52-jarige jongern- en opbouwwarker is honkvast. As kind wus e al dat in Beilen blieven wol.
Aardrijkskunde vun e wal mooi, maor wat Harold Kamps later worden wol, wus e as tiener niet zo goed. Hij keus veur toegepaste geografie in Leeuwarden. „De decaan vreug mij wa’k later doen wol. ‘In Beilen wonen en warken’, zee ik. Nou, met die achtergrond kun dat wel ies lastig worden, dacht e.”
Toch komp de Beiler nao zien studie in zien woonplaots an het wark: bij de VVV en de Promotiegroep Beilen. „Qua wark misschien under mien niveau, maor ik vun het hiel mooi. Diels warkte ik op kantoor en daornaost was ik betrökken bij de organisatie van de wekelijkse Wende-aovends in de zummervekaansie en de jaorlijkse feestweek.”
„As kind vun ik ‘t al mooi as der wat organiseerd weur in het dörp en dacht ik: dat wil ik later ok doen”, vertelt e wieder. „Beilen vuult echt as mien thuus. Ik vuul mij stark verbunden met het dörp.”
‘Beileroord-gezin’
Kamps, vader van twie volwassen dochters, gruide op an de Julianastraat bij de Stefanuskerk. Oet wat veur gezin e komp? „Een Beileroord-gezin. Mien pap en mam warkten daor allebei as maatschappelijk warker. Ze bint op de verpleegofdieling begund en zaten destieds intern.”
Hier kom ik weg
De streektaolrubriek Hier kom ik weg is een samenwarking met het Huus van de Taol en giet over Drenten en heur verhalen. As kandidaten plat praot, wordt ze in heur eigen variant van het Drèents citeerd. Schrievers Jessica Bonnema en Annemiek Meijer gebruukt heur eigen variant: resp. het Zuudoost-Veen- en het Zuudoost-Zaand-Drèents.
Zien breur is in het olderlijk hoes blieven wonen. „Hij warkt nou ok in de psychiatrie op het GGZ-terrein, net as oeze olders vrogger. Hij is geliek al die kaant opgaon. Ik wol dat beslist niet. Over je gevuul praoten, zoas bij oes thuus gebeurde, dat huufde van mij niet zo. Ik vun het allemaol wat te zweverig. Nou mark ik toch da’k zölf ok die richting opgaon bin, allent dan in het welzijnswark.”
Energie
Kamps warkt veural in Hooghaolen en Hieken. Daor kent e nao zowat 25 jaor haost iederien. „Bij Welzijnswerk Midden-Drenthe is het uutgangspunt dat dörpen zölf verantwoordelijk bint veur de leefbaarheid en activiteiten die holden wordt. In mien rol as jongern- en opbouwwarker bin ik gangs um mèensen daorbij enthousiast te kriegen, te stimuleren en te begeleiden. Ik moet zörgen dat projecten loopt en dat groepen activiteiten oppakken kunt.”
Harold Kamps bij de bekende 'dikke boom' in zien woonplaots. Foto: Gerrit Boer
Daorbij zit e zo min meugelijk op kantoor in Beilen, zeg e. „Ik wil in de dörpen wezen. Daor krieg ik energie van. Ik heb ok altied te maken met mèensen die iets positiefs wilt, of het nou veur de jeugd is of veur oldern in het dörp. Dat is mooi.”
‘Hooghaolen en Hieken’
De streektaol komt daor ok bij van pas. „Van huus uut praot ik Nederlands, maor as iene in de dörpen waor ik wark plat prat, schakel ok zo over. Dat is mooi en gef echt verbinding. Ik vuul mij ok stark verbunden met het Drèentse landschap. Het Hiekerveld, waor ik graag kom um de kop leeg te maken, gef mij rust.”
Hieken en Hooghaolen ligt körtbij mekaar, maor Kamps zöt wel verschil. „In Hooghaolen bint de mèensen wat liever veur mekaar en in Hieken bint ze wat dudelijker, wat directer. Het dörp lig an het Oranjeknaol. Er is toch iets meer een ‘veenmentaliteit’. Maor beide vin ik mooi.”
